Lamentablemente, tin hende ta kere cu ta placa ta tur cos, pero hopi placa sin amor y respet den bo hogar, no ta trece felicidad, ta mustra un probresa comunicativo, pasobra no tin e union cu ta pone famia sali pa dilanti, pasobra financieramente e cos ta mustra bon, pero e curason no tin pas.
No pone placa dilanti di Dios, no sirbi placa enbes di Dios, placa ta temporal. Tur hende mester di placa, pero no laga placa domina bo bida, y si antes bo no tabatin placa y awor bo tin placa, no cambia bo manera, pero sigi biba humilde, asocia bo mes cu hende humilde, y especialmente no tira bo famia afo pa motibo di placa.
Berdaderamente ora hende ta malo,nan ta bin ripara cu e cantidad di placa cu tin no por yuda nan sali for di e malesa, ta Dios mes tin tur cos den su man, y ta Dios tin e ultimo palabra den nos bida.Cristo Hesus ta nos unico y berdadero,sanador , placa no por reemplasa Dios den ningun caso.
Ora ta trata di Famia, Amor y Respet ta e base di formacion,sin amor y sin respet,e yuinan no tin nada pa gara na dje den nan crecemento.
Si e muchanan no ta mira nan mayornan ta trata otro bon y stima otro,nan tambe ta lanta sin amor pa otro, sin amor pa nan mes, y sin amor pa prohimo.
E Palabra di Dios ta sinja nos pa stima Dios riba tur cos, cu nos curason y nos mente y nos alma y stima nos prohimo manera nos mes, den esey tur e Dies Mandamentonan ta inclui, pasobra tambe ta wordo demostra cu nos no mester haci cu hende locual nos no kier pa hende haci cu nos.
Efesionan capitulo 6 ta cuminsa mustra cu yuinan mester obedece y honra nan mayornan , pa asina tur cos bay nan bon y pa nan tin bida largo riba tera.
Mescos tambe e mesun capitulo 6 ta bisa mayornan pa no proboca nan yuinan, pero lanta nan den e disiplina y instruccion di Senjor.
No lubida cu pone un mucha rabia, door di papia malo cune, insulte,traha nomber vulgar pe, esey ta conta bao di abuso di mucha, y no conta mes ora mucha ta wordo sera den cas pa mayornan ta rek paranda riba caya, y e mucha no tin cuminda den cas.
Tin caso extremo caminda mucha ta wordo sera den camber, pa e no mira e cosnan baho y inmoral cu su mayornan ta envolvi den dje, tin biaha hasta droga ,bruheria y adulterio.Tur esey tambe ta abuso di mucha.
Efesionan capitulo 5: 22-33 ta papia di e amor cu un homber mester tin pa su esposa, y con e esposa mester respeta y somete su mes na su esposo, pero un cos ta importante , pasobra caminda no tin amor y respet di parti di e homber, e sometemento di e muher ta tranca, paso e base di matrimonio ta amor y respet, den matrimonio tur cos no ta e bida sexual.Ta imposibel insulta un hende, manipula y maltrata un hende y despues bo kier tene relacion sexual cune pasobra e ta bo esposo/esposa.
Y tene cuenta cu tur e cosnan ey yuinan ta mira, y despues ora nan ta casa den nan cas nan ta kere cu manera nan mayornan a trata otro asina nan mester trata nan esposa/esposo y esey ta trece resultado negativo den un matrimonio.
Palabra di Dios, Amor y respet ta prioridad di nos Matrimonio y Famia.
Sinceramente , Pastor Marcel Balootje
