Pasobra Dios no a duna nos un spirito di temor, sino di poder y di amor y di sano huicio.
( 2 Timoteo 1:7).
Esun cu vence lo hereda e cosnan aki,y Ami lo ta su Dios y e lo ta Mi yiu. Ma e corbardenan, y e incredulonan,y e abominabelnan y e matadonan,y e fornicadornan y e hacido di bruha, y e adoradornan di dios falso,y tur ganjado, nan parti lo ta den e lago cu ta kima cu candela y zwavel,cual ta e di dos morto.(Revelacion 21:7-8).
No perde tempo debati tocante adulterio, homosexualismo y aborto, pasobra tur pica ta inmoralidad, y tur inmoralidad ta maldad.Tur pica ta hiba na morto y despues fierno.
Nos ta para dilanti di un situacion social hopi delicado, caminda hopi hende ta tira falta riba droga y alcohol, marcando asina e condicion di nos hubentud y e comportacion di hende grandi.
Pero un cos ta notabel tur caminda, cu e nivel di educacion cu nos muchanan ta sali for di cas cune a baha hopi, pa no bisa demasiado.Y comportacion di hende grandi ta laga di desea.
Un pregunta ta surgi: Kico tin mas balor pa un hende, su trabao, placa, posicion of su famia?
Kico ta bal bo yiu tin tur cos y e no tin bo amor y conseho pasobra casi ningun momento bo no tey?
Y ora bo ta liber bo ta den gym of den Happy Hour, mayor tene cuenta.
Ta masha facil pa sconde tras di trabao, cual hopi biaha nos ta traha dos trabao pa orguyo y pa competi, mientras cu na cas no tin atencion,control, disiplina y coreccion .
Tene bon cuenta cu un mucha cu no tin respet pa su mayor na cas, no ta respeta ningun hende riba caya, tampoco autoridad, pasobra na cas e no a haya suficiente educacion di su mayornan.
No ta tur mucha cu a cay sera, ta pa motibo di droga/arma , tin di nan bo ta mira flat den nan cara cu ta falta di educacion cu ta bini di cas, pasobra nan mayornan mes no tin suficiente.
Awor a yega e momento pa predica e palabra manera e ta , y no acomoda of troce e palabra pa haci hende contento, ningun caminda den bijbel Hesus a haci esey.
E bisa cla pa tur hende comprende: Ami ta e caminda, y e Berdad, y e Bida, ni un hende no ta bin serca e Tata sino pa medio di Mi.( Juan 14:6).
No tin excuus Cristo Hesus ta e caminda di berdad.
E palabra di Dios mester wordo predica manera e ta para scirbi, pasobra e palabra di Dios no tey pa complace hende, sino pa salba y coregi hende, pasobra Dios no tin persona favorito.
Pa motibo di troce e palabra di Dios cu doctrina stranjo ( Timoteo 4:1-2) ta pone hende tambalea, bira friuw, y kere cu por biba y participa den tur clase di bagamunderia y no perservera te na fin pa nan ta salba ( Mateo 24:13)
Trocemento di palabra di Dios ta pone cu hende no ta reconoce Dios, y ta sosode locual ta para scirbi den Romanonan 1 :28-32 cu Dios mes lo entrega nan na un mente perverso pa haci cosnan cu no ta cumbini.
Ta tempo pa predica e palabra fuerte pa conscientisa hende, pasobra maldad ta aumenta, inmoralidad ta den cada skina, e enemigo ta cla pa haci danjo na hogar, matrimonio y famia.
Tur palabra di Dios cu ta sali for di nos boca mester sali cu curashi, pasobra cobardia no ta di Dios,
Sinceramente, Pastor Marcel Balootje
