Negativismo ta bini di e mundo di scuridad, y enemigo ta usa hende pa papia palabra negativo contra otro, cu e proposito cu e palabra lo tranca e proposito di Dios den bo bida.
Nos tur sa cu tin conseho positivo y tin conseho negativo, den un conseho positivo, deseo di Dios ta presente, pero den un conseho negativo deseo di e malbado ta presente.
Pesey e palabra di Dios ta bisa den Romanonan 8:31 : Si Dios ta pa nos, ken por ta contra nos?
Pero tambe e palabra di Dios ta bisa den Santiago 4:7: Pesey somete boso mes na Dios resisti e diabel,y e lo huy for di boso,hala serca Dios y E lo hala serca boso.
Aki nan nos ta cumimsa mira e condicion cu Dios kier pa nos ta biba aden, pa asina nos por depende riba Dios su proteccion, Dios su proteccion ta riba nos 24/7 ora nos ta somete na Dios.
Ora nos ta den presencia di Dios constantemente, e palabra di enemigo lo bira piedra di construction pa nos,pasobra for di locual ta negativo, nos lo hanja mas forsa pa traha bay dilanti.
Ningun arma cu wordo forma contra bo lo no prospera,y tur lenga cu lanta contra bo, den husgamento lo bo condena.Esaki ta e herencia di e sirbidornan di Senjor . Y nan husticicacion ta bini for di MI, Senjor ta declara.( Isaias 54:17).
Ora nos ta biba den boluntad di Dios, Dios mes zorg pa nos, pero ora nos desvia for di caminda di Dios e enemigo ta cana manera leon cu ta grunja buscando ken e por debora.
Pesey tur hende mester tene cuenta cu nos no por biba dos bida, nos no por come for di dos mesa,nos no por participa na dos fiesta, nos ta tempel di Dios y e Spirito di Dios ta biba den nos.
Den Job 42:2 Job ta bisa Senjor: Mi sa cu bo por haci tur cos,y cu ningun di bo propositonan no por wordo stroba.
Laga nos tene cuenta cu esaki, cu ora bo ta cana den boluntad di Dios y Dios tin algo pa bo,nada no por stroba esey di sosode, si abo personalmente kere den palabra negativo di hende lo bo cay atras.
Dios no tin mester conseho di ningun hende, ora e ta bay haci algo den bo bida, pasobra Dios ta wak bo curason y E sa ora bo ta cla pa E haci locual e kier haci.
Ningun hende no por sorpresa Dios, pesey bo mester tene bon cuenta kico hende ta papia, y cu disernimiento di Dios, lo bo sa si e ta bon pa bo.
Como mayor nos mester tin un bon relacion cu nos yuinan, pasobra nan ta tende y mira hopi cos.
Un conseho hopi bon ta: Si bo cumpra un telefon pa bo yiu, bo tambe mester tin e password di e telefon pa bo por drenta y wak kico bo yiu ta ricibi.
Pasobra hopi biaha nos ta mira un mucha su comportacion ta cambia, y esey ta bini di cosnan cu e ta mira, of mensahenan cu e ta ricibi, cu ta cambia su pensamento, y si bo no por kita e telefon di e mucha y drenta den dje , e situacion por bira hopi delicado.
Tene cuenta cu cada wega cu tin den tablet abo como mayor mester ta na altura di dje, pasobra nos ta bibando den tempo peligroso.
No laga ningun palabra negativo influencia bo bida, corda semper cu e palabra di Dios, tin poder pa kibra y desvia tur maldad.
Sinceramente, Pastor Marcel Balootje
