Weekend próximo Papaya Ranch ta organiza su Torneo Himno y Bandera di bolas criollas cu un participación di 62 ekipo total. Cu gran aprecio Papaya Ranch ta rindi honor na sr. Haime y sra. Brigida Dijkhoff, fundador y hungadornan di ekipo Jairo’s Bolas Team. Pa Haime y Brigida su gran dedicación y amor pa bolas criollas pa mas di 20 aña, Papaya Ranch ta dedica e torneo aki na e gran persona nan aki..
Diadomingo 16 maart 2025 pa 9:45 mainta lo tuma inicio di Torneo Himno y Bandera di Bolas Criollas na Papaya Ranch unda sr. Haime y sra. Brigida lo saca prome bola. Después weganan di infantil, hubenil, damas y caballeros lo sigui durante día te cu 7:00 di anochi. Dialuna 17 maart 2025 lo sigui cu e weganan y diamars 18 maart 2025 pa 10:00 mainta lo tin canto di Himno y hisamento di Bandera pa despues ekiponan sigui batalla pa asina atardi tin e gran final pa haya resultado di Campeon, Sub-Campeon, 3er y 4to lugar den cada categoría. Tambe lo tin premio pa Mihor Boche y Mihor Arime den cada categoría. Pa culmina e torneo lo tin ambiente musical di Shine Music Aruba desde 5:00 atardi, bin baila y goza!
Papaya Ranch ta invita henter pueblo di Aruba pa bin duna honor y aprecio na sr. Haime y sra. Brigida Dijkhoff. Tambe bin apoya nos ekiponan di bolas criollas y pasa dia cu famia y disfruta di un bar bon surti y cushina crioyo crioyo!
Ban hunto celebra nos Dia Nacional y engrandece bolas criollas y deporte di Aruba en general.
