Den Juan 18:37, ta para scirbi,Hesus ta bisa, Mi a nace, y pa esaki Mi a bin den mundo, pa duna testimonio di e berdad. Tur esnan cu ta di e berdad ta tendi Mi bos.
Den Juan 8:37 ta para scirbi: Y boso lo conoce e berdad, y berdad lo haci boso liber.
Tur hende mester sa kico berdad por haci;
Berdad ta trece seguridad den un pais.
Berdad ta trece seguridad den un matrimonio.
Berdad ta trece seguridad den educacion.
Berdad ta trece seguridad den iglesia.
Berdad ta trece seguridad den un Famia.
Aunke berdad ta haci dolor, berdad semper lo prevalece, pasobra berdad ta haci consenshi di hende limpi y liber, y ta kita tur chens di wordo acusa door di e enemigo.
Hende por papia di bo pasado, pero nan por para bo progreso ora bo ta papia e berdad, y biba cu e berdad.
Berdad semper lo keda pica wowo di esnan cu ta mentiroso y semper lo keda causa diarrea pa esnan cu kier sconde e berdad, pasobra berdad ta bini di Dios.
No laga ningun hende lubida cu e prome pica cu a sali aki na mundo a bini door di mentira, bisando hende cu nan lo bira igual cu Dios, y e diabel sa cu esey no ta posibel, pasobra e mes a kere esey, y a faya.
No tin ningun trabao na mundo cu ta obliga hende ganja of cambia palabra pasobra mentira ta temporal, mesun mentira cu awe ta halsa bo, mayan ta laga bo cay duro ora tur hende mester sa e berdad.
Tur locual hende mester ganja pa yega na dje un dia lo trece berguensa, pasobra mentira ta un gran berguensa.
Laga nos educa nos yuinan den e berdad, no solamente e berdad di e Palabra di Dios, pero e berdad den nos bida social, pasobra pa Dios, mentira ta keda mentira y mentira ta pica, y pica ta hiba na condenacion.Y caminda tin mentira no tin confiansa.
Lipnan cu ta papia berdad lo ta stableci pa semper,ma un lenga mentiroso ta pa un tempo so.( Proverbionan 12:19).
Cuanto sistema no tin awendia pa ganja hende y saca probecho, y cuanto biaha hende no ta wordo avisa, pero toch nan ta sigi pretende, sabiendo masha bon cu nan ta den un mentira.
Esun cu ta cana den rectitud, ta cana confiadamente,ma esun cu perverti su caminda lo wordo descubri.( Proverbionan 10:9).
Lipnan mentiroso ta un abominacion pa Senjor,ma esun cu ta trata cu fieldad ta Su delicia.( Proverbionan 12:19).
E muchanan di awendia, mester sa e berdad y ta deber di tur mayor pa bisa nan e berdad, cu ta e mesun cara di awe , ta e cara cu lo bo tin di presenta mayan, cu no ta bale la pena destrui bo mes apariencia cu droga , alcohol y paranda, pasobra mayan tur e cosnan aki por stroba bo di avansa den bida.
Hopi hoben nan apariencia ta mustra bieu door di uso di droga y alcohol y perdida di sonjo, falta di descanso, y tur e cosnan ey ta traha poco poco riba bo salud mental.
Evita mentira, evita pleito, evita hacimento di redo y evita violencia, tur esaki por wordo evita ora e berdad wordo papia, y reconoce cu bo tin fout, y pidi despensa, y asina demostra educacion berdadero.
Caminda tin mentira tur hende ta wordo perhudica, tanto esun cu ta papia e mentira como esun cu ta wordo enganja.
Berdad ta bini di Dios, mentira ta wordo apoya pa diabel e tata di mentira.
Biba cu e berdad,
Sinceramente, Pastor Marcel Balootje
