Parlamentario Gerlien Croes tambe a kibra silencio riba e crisis den AVP. Via su pagina social el’a hasi algun refleccion di e lucha. E ta informa tambe cu “berdad y echo” a trece discordia den su mes partido.
El’a skirbi: Den bida nos lo confronta momentonan bon y momentonan menos bon. E momentonan aki hopi bes ta duna nos oportunidad pa pensa y refleha, pero mas importante recorda nos mes ken nos ta como persona, di unda nos a bin y unda nos kier sigui bay.
Dia 17 di mei 2017 na 30 aña di edad, mi a presenta mi mes como candidato oficialmente ariba lista politico. Na 2021 comunidad a duna mi 1919 voto di sosten pa vocifera pa nan como nan representante den Parlamento di Aruba.
Den nomber di e generacion aki cu continuamente mi ta referi na dje, mi ta hibando e lucha vociferando den un forma diferente cu pueblo ta custuma, papiando di berdad y e echonan. Pero papia di berdad y echo, awe a trece discordia hasta den mi mesun seno di partido.
Na mi generacion, aunke mi ta reconoce cu ta existi un miedo inmenso cerca boso pa afilia boso mes na politica, mi ta spera boso reconoce con duro e lucha pa cambio ta y mi ta spera cu mescos cu ami boso tambe tin speransa y ta realisa cu ningun lucha ta envano.
Sea locual sea, mi kier corda boso (mesun cos cu mi a haci na 2017 durante mi anuncio) cu ta nos deber pa duna e pais aki e miho di nos mes!–
