E cantante Mexicano Francisca Viveros Barrada, conoci como Paquita la del Barrio, a registra como precandidato na diputado local di e partido Movimiento Ciudadano den e estado di Veracruz.
Durante un rueda di prensa, e interprete a manifesta cu el a acepta e invitacion di e agrupacion politico socialdemocrata pasobra “loke ta prevalece den bida ta amor.”
“Esey ta loke mi tin pa mi tera, pa Veracruz y pa mi pueblo. Mi stima mi hendenan,” el a afirma. Memey di yanto, e artista, cu 40 aña di trayectoria y tambe conoci como “La reina del pueblo”, a bisa cu e no sa loke e lo enfrenta despues di su ingreso den politica Mexicano.
“Mi no sa kico mi ta bay haya, solamente mi sa cu tin hende mi tras cu lo bay siñami maneha e asunto aki,” e cantante di “Rata de dos patas”, di 73 aña a bisa.
Ora cu el a caba cu su declaracion, el a canta su famoso temanan “Tres veces te engañe,” “Cheque en blanco,” “Rata de dos patas” y “Sin fortuna”, compaña pa un grupo di mariachi.
“La guerrillera del bolero”, manera cu e ta yama tambe, a wordo invita algun dia atras pa Movimiento Ciudadano pa e asumi e candidatur pa e diputacion local di e districto di Misantla.
Despues di acepta e peticion, e grupo politico a cualifik’e di “ta un honor” cu “un muhe di lucha” a atende e invitacion.
Dia 6 di juni proximo, lo tuma luga e eleccion di 500 miembro di e Camara di Diputadonan Federal.
Viveros Barradas ta reconoci na Mexico y na America Latina pa su letranan carga di mensahenan fuerte contra di machismo.
Un di e frasenan mas recorda den su presentacionnan riba escenario, ta e emblematico: “Me estas oyendo, inutil?”.
