Cu tur locual ta pasando rond di nos , e ta exigi di nos Fe y Firmesa den Cristo Hesus.
Nos mester para duro contra e plannan di e enemigo cu ta bini solamente, pa horta , pa mata, y pa destrui, pasobra di berdad nos ta mira con falta di respet y inmoralidad ta birando mas grandi.
Cristo a priminti cu nunca E e lo bandona nos, ni tampoco desampara nos, pero tambe E ta bisa den Su palabra cu esun cu perservera te na fin, esey lo ta salba.
E cosnan aki Mi ta bisa boso, pa den Mi boso por tin pas. Den mundo boso tin tribulacion, ma tene curashi Mi a vence mundo.( Juan 16:33).
Tur locual cu por wordo sacudi, lo wordo sacudi, matrimonio, famia, hubentud , tur esakinan lo wordo sacudi, pa asina hende yega na firmesa den Senjor.
Kico ta nifica e firmesa den Senjor?
Esey kiermen cu tur hende mester tin Cristo Hesus como nan Senjor y Salbador, ta pa esey e Evangelio di e reino di Dios ta wordo predica, no como religion pero como un relacion intimo cu Hesus Cristo, y pone Cristo Hesus na prome lugar den nos bida, pa asina cu ora E bini, nos bay cune.
Senjor a priminti bisando : No tene miedo, pasobra Ami a redimi bo, Mi a yama bo na bo nomber. Ora bo ta pasa door di awanan lo Mi ta cubo,y door di ruinan, nan lo no lastra bo bay cu bo. Ora bo cana door di candela, esaki lo no flama bo, ni e vlam lo kima bo,pasobra Ami ta Senjor Bo Dios.(Isaias 43:1-3) Esaki ta un speransa cu nos tur por gara na dje, pasobra e palabra y promesa di Dios nunca ta cambia.
No ta tempo pa hala atras for di e caminda di Dios, no ta tempo pa fria den nos sirbishi na Dios, no ta tempo pa nos ocupa den cosnan di mundo, cualnan ta temporal, y lubida riba esun cu ta duna nos bida eterno.
Nos mester corda cu ta den Cristo Hesus so tin salbacion, tur otro cos ta temporal, y ta keda aki bao na mundo, mundo y su politica, su sistema ta pasa bay, pero Cristo Hesus lo permanece pa semper.
Tambe Senjor lo ta un refugio pa esnan oprimi,un refugio den temponan di angustia. Y esnan cu conoce Bo nomber, lo pone nan confiansa den Bo,pasobra Abo O Senjor, no a bandona esnan cu ta busca Bo. ( Salmo 9:9).
Nos ta bibando den e tempo den cual e palabra di Dios ta bisa nos: Ay di esnan cu ta yama loke ta malo bon, y loke ta bon, malo, loke ta scuridad lus, y loke ta lus scuridad,loke ta marga dushi,y loke ta dushi, marga.( Isaias 5:20).
Tur esaki hende ta haci pa complace cu hende, pa gana amistad di hende, y lubida cu esey ta temporal, y no tin entrada dilanti di Dios.
Senjor ta bon pa nos tur y Su misericordia, Su pordon, y Su compasion tey pa nos tur, Senjor ta stima nos tur , y Su salbacion tey pa tur esnan cu ta kere den Su Yiu unigenito. (Juan 3:16).
Hesus Cristo ta mescos ayera awe y pa semper. ( Hebreonan 13:8).
E mundo cada dia ta bira mas moderno, pero e palabra di Dios , no ta modernisa, e ta eterno, e tey pa semper pa duna firmesa den bida y curason di tur esnan cu ta kere den dje.
E tempo ta dificil y lo bira mas dificil.
Laga nos para firme.
Sinceramente,Pastor Marcel Balootje
