ORANJESTAD: Na inicio di e siman aki mi a tuma nota di e comunicado di prensa di Parlamentario Berlis, unda den su sed pa e haya 5 minuut di fama e ta elabora riba aspectonan sin sentido.
Primeramente mi kier para keto na e parti unda su persona ta duna di conoce cu Partido MAS ta haciendo daño na Aruba su imagen. Riba e punto aki mi kier refuta su expresion y ta di lamenta cu Parlamentario Berlis a perde su compas, pues na ningun momento fraccion di MAS a of ta haciendo daño na imagen di nos dushi isla. Loke si ta e caso cu ta danki na e iniciativa di Partido MAS y Accion 21 cu a haci un peticion por escrito pa un reunion publico relaciona cu Rapport Carmabi.
Tin cu refresca memoria di sr. Berlis cu ta danki na Carmabi cu a dicidi di publica e documento riba nan plataforma digital, Parlamento y Pueblo a keda informa di e resultado di e investigacion realisa. Den su funcion como Parlamentario e ta ‘suppose’ di ta na altura cu esey no ta e procedura corecto con e Gobierno cu e ta sostene tin cu extende informacion (documento) na Parlamento.
Durante e tratamento di Carmabi rapport den Parlamento, unda Gobierno no tabatin otro alternativa di entre otro splica Parlamento ki ta e motibo(nan) cu Gobierno no a duna cuenta anteriormente na Parlamento, considerando cu na februari 2021 e mandatario encarga cu RWZI a institui un ‘stuurgroep’ cu tabatin como meta pa bin cu recomendacionnan concreto pa asina Gobierno atende cu e problematica. Expresionnan for di proporcion a keda haci door di Prome Mandatario unda el a indica entre otro cu el a mantene e rapport scondi y cu e rapport a ‘leak’. Ta tristo y lamentable di scucha tal expresionnan, mientras cu na final di dia ta e pueblo pagado di impuesto ta esun cu a paga pa dicho investigacion por a keda efectua.
Consecuentemente mi kier reacciona riba tres expresionnan haci door di sr. Berlis na mi persona.
a.Sr. Berlis ta cuestiona mi presencia durante bishita di trabou na e dos RWZI y tambe e incinerator.
No ta autoridad di sr. Berlis determina cua bishita di trabou ami como Parlamentario ta presencia of no. E ta responsabilidad di cada Parlamentario tuma su propio decision y postura, irespecto kico mi a vota durante reunion publico.
b.Sr. Berlis ta considera mi postura como anti Aruba.
Ta fundamental pa e ser humano canalisa bon loke e ta bay expresa, prome cu e haci tal. Postura anti Aruba, ta ora un Parlamentario vota pro pa un ‘deal’ Eagle LNG sin cu el a dispone di informacionnan (documento) concreto kico esaki lo nifica pa e comunidad Arubano.
Postura anti Aruba ta na momento cu e Parlamentario (representante di Pueblo) atraves di su voto mara e pueblo na man cu pia pa un termino di 20 aña na un deal dudoso. Y e parti mas tristo ta cu cueste loke cueste e ‘deal’ mester a keda concretisa sin importa ken of kennan mester a keda hala un banda.
Postura anti Aruba ta ora durante e reunion publico di 25 di oktober 2021 e fraccion di coalicion den su totalidad a vota contra e mocion di MAS y ACCION 21 pa efectua e ley di screening di integridad di minister cada pasa un aña pa salvaguardia e integridad di cada mandatario.
Postura anti Aruba ta ora e Parlamentario (e voz di e pueblo) no ta pone den ehecucion e Trias Politica y tampoco ta ehecuta su rol primordial, cual ta controla e maneho di gobierno. Simplemente debi na e hecho cu bo ta sostene e Gobierno.
c.Contento cu mi a atende e bishita di trabou, pa asina mi por a haya informacion al caso.
Un biaha mas mi tin cu remarca cu e evaluacion cu mi a haci relaciona cu e bishita di trabou no ta competencia di sr. Berlis. Mi ta considera e expresion haci door di sr. Berlis for di contexto, pues saliendo for di e aspecto di logica, Parlamentarionan a ricibi e informacionnan for di tres experto den e materia.
Pa finaliza Parlamentario Gunn kier conseha Parlamentario Berlis pa pone den practica loke el a bin ta predica, esta di hiba un politica nobo y riba nivel. Lamentablemente loke mi por a experencia di su persona te na e momento aki ta cu e ta den e mesun spiral anticua acopla na un cara nobo(lesa= cara di Parlamentario Berlis). Kisas lo ta oportuno pa e tuma den reconsideracion di pone un paro na lesamento di dictado.
