Parlamentario Carlos Bermudez: “Caribe Hulandes ta busca un ‘familiegevoel’ di Den Haag pa cu e situación entre Venezuela y Merca”

Riba 26 di september ultimo, durante un reunion di e Interparlamentaire Koninkrijksoverleg (IPKO), miembro di Eerste Kamer, señor Jeroen Recourt (GroenLinks-PvdA) a expresa cu segun su opinion e topico di geopolitica – y den particular e situacion Merca–Venezuela – no ta un punto cu ta biba bou di e ciudadanonan di Hulanda. 

Posiblemente esaki tin di haci cu e echo cu señor Recourt lo no a tuma e topico specifico aki na cuenta durante e preparacion pa su presentacion ya cu no ta e topico principal di su presentacion.

Durante e reunion cierto preguntanan a keda formula riba e topico di geopolítica. Sinembargo, no a ricibi contesta pa motibo cu a prefera pa trata esakinan riba e siguiente dia (27 di september), pasobra pa dia 27 e punto ta formalmente inclui den e agenda.

Riba 27 di september, durante e tratamento di e topico di geopolítica, e delegacionnan di Hulanda, Aruba, Sint Maarten y Corsou a ricibi dos presentacion: un di señor Verbossen, Senior Research Fellow – Security Unit na Clingendael Instituut, y un di señor Oostindie, Senior Onderzoeker / Emeritus Hoogleraar Koloniale y Post-koloniale Geschiedenis na Universiteit Leiden.

Durante e ronda di pregunta – cu desafortunadamente no tabata publico – Parlamentario Carlos Bermudez a haci uzo di su derecho pa expresa su preocupacion. Prome cu el a haci su pregunta, Bermudez a splica cu e no a keda trankil cu tur loke a scucha, y cu e tabata convenci cu por papia den nomber di e delegacion di Sint Maarten y Corsou. 

Bermudez a expresa cu, den su opinion, e presentacionnan ricibi no a mustra e ‘familiegevoel’ cu ta fundamental den Reino. E paisnan den Caribe, Aruba Sint Maarten y Corsou SA hopi bon kico ta un sentimento familiar. Sinembargo, hopi biaha nos ta sinti cu door cu nos ta fisicamente leu, ta lubida cu nos ta famia den Reino. 

E expectativa ta cla: ora cu ta trata di un situacion delicado manera Venezuela–Merca, nos, e tres paisnan kier scucha palabra firme cu Madre Patria lo ta presente pa proteha nos. Nos mester sinti na tur momentonan cu nos ta wordo trata manera famia den Reino.

Na final, Parlamentario Bermudez a puntra, aunke cu na su opinion tin un chens cu esunnan cu a duna e presentacion no ta esunnan cu por contesta e pregunta, pero el a hacie toch pasobra tal vez e coleganan di Eerste y Tweede kamer si por yuda pa haya contesta. E pregunta ta si tin escenarionan pensa pa cu e situacion di Venezuela – Merca  pa garantisa nos siguridad y proteha nos frontera y nos economia.