Parlamentario Carlos Bermudez a expresa su satisfaccion na final di e presentacion cu Minister Geoffrey Wever a comparti diamars mainta cu parlamento, caminda a duna un splicacion cla riba cuater incentivo fiscal importante cu ta forma parti di e vision economico di gobierno y a drenta na vigor dia 1 di januari 2026.
E incentivonan fiscal nobo ta consisti di e expatregeling, cu ta enfoca riba atrae profesional hoben pa bin bek Aruba; e begunstigendbeleid pa revitalisa e area di San Nicolas y Oranjestad; e startersregeling pa companianan y emprendedornan cu kier cuminsa un negoshi; y tambe e componente di Freezone. “Ta informacion sumamente balioso, no solamente pa parlamentario, pero tambe pa pueblo,” segun Bermudez.
E parlamentario a haci un yamada directo na studiantenan Arubiano cu ta den exterior pa wak e video di e presentacion cu atencion, specialmente e parti di e expatregeling. “Tin hopi posibilidad pa hobennan bin bek Aruba, y tambe hopi oportunidad cu dunado di trabou por brinda,” el a destaca.
Ademas, Bermudez a enfatisa cu e incentivonan fiscalnan ta di gran importancia pa starters, cu un enfoke particular riba e sector FinTech. “Nos hobennan ta sumamente interesa den FinTech, y aworaki ta e oportunidad pa cuminsa cu bo propio negoshi den e mundo di FinTech y beneficia di tur e incentivo fiscalnan cu ta disponibel.”
Parlamentario Bermudez a destaca cu e incentivonan fiscal ta aplica pa un periodo di cinco aña, comenzando na 2026, y cu esaki ta mustra cu e gabinete AVP futuro ta traha cu un vision claro pa e futuro di Aruba. “Gobierno kier mira diversificacion di nos economia pa nos no keda depende solamente di turismo.”
Finalmente, el a conclui cu un mensahe stret na pueblo: “Gobierno ta brinda bo e caminda; awo ta keda den man di pueblo pa can’e.”
