Parlamentario Clifford Heyliger: Refineria ta otro desaster di gobierno anterior pa awo si soluciona

Parlamentario Clifford Heyliger a recorda un y tur e siman aki cu e estado lamentabel di e instalacionnan di nos refineria no a surgi di un dia pa otro y tin un responsabel so: e dos ultimo gobierno di signatura MEP. 

Segun Heyliger, e ruina cu nos ta mira awe ta danki, no solamente cu a libra e ultimo operador di su clausula di limpiesa, pero tampoco a tuma un accion di nan mes pa mantene ni reutiliza e instalacionnan. Semper e topico a keda na puro promesa.

Manera ta conoci, e refineria no ta operacional desde 2012. Indepedientemente di e negociacionnan cu Citgo, entre 2017 y 2024 no a haci ningun mantencion structural serio na e instalacionnan. Resultado: infrastructura a deteriora gravemente, cu smokestacks y otro structuranan industrial den estado peligroso.

Heyliger ta enfatisa cu decisionnan politico den e periodo ey a contribui directamente na e situacion actual. Den e lease agreement cu tabata vigente, Citgo tabatin obligacion di desmantela refineria bou ciertonan condicion y cu un responsabilidad maximo di $150 miyon. Sin embargo, gobierno a dicidi di tuma refineria bek sin exigi cumplimento di e clausula di desmantelacion.

“Esaki ta un decision cu a pone nos pais den un posicion financiero y ambiental extremadamente vulnerabel,” segun Heyliger. E parlamentario ta recorda cu durante varios aña a papia di inversionistanan cu tabata ‘warda’ pa inverti den refineria, pero finalmente ningun inversion real no a materialisa. 

Entretanto, gobierno a mantene un actitud di “wait and see” sin un plan concreto pa mantencion, reconversion of desmantelacion responsabel. Actualmente Parlamento a wordo informa cu tin intencion pa sigui un maneho di dos meta: un proceso di planificacion pa eventual desmantelacion, cu por dura entre 1 y 2 aña, y alabes evaluacion di oportunidadnan den industria petrolero, manera terminal di transshipment y almacenamento di combustibel.

“Nos no por laga e mesun gobierno cu a crea e problema, laba su man manera Poncio Pilato y, riba dje punta dede riba otro,” Heyliger a declara. “Realidad ta cu ta Gabinete Wever-Croes I y II a dispensa e ultimo operador di su clausula di limpiesa, y nan mes no a no a haci mantencion of implementa ningun plan serio pa reutilizacion.”

E parlamentario ta reiterando su yamada pa transparencia total den e proceso cu ta bin, incluyendo instalacion di un comision independiente di experto pa evalua estado structural, responsabilidadnan legal y opcionnan realistico pa futuro.

“Pueblo di Aruba merece berdad. E ruina cu nos ta mira awe no ta resultado di circunstancia externo so, sino di decisionnan politico specifico. Responsabilidad mester wordo asumi, y solucion mester wordo basa riba hecho y no riba relato,” Heyliger a conclui.