Miembro di Parlamento di Fraccion di MEP sr. Dangui Oduber ta keto bay preocupa cu e situacion cu tin na nos aeropuerto. A transcuri mas cu 70 dia y ainda parlamento di Aruba no a ricibi e MoU cu e wordo firma entre gobierno di Aruba y Royal Schiphol Group. Nos no sa kico tin di sconde y den cuadro di transparencia ta mas cu logico cu gobierno ta comparti e MoU aki cu parlamento di Aruba, cual te awe esey ainda no a sosode.
E contract entre AAA N.V. y Royal Schiphol Group lo vence aki 1 luna y gobierno ainda no kier duna claridad kico tur a wordo negosha y kico tur a wordo entrega na Schiphol. Pa es motibo sr. Dangui Oduber a dirigi varios pregunta na minister Cicilia pa asina haya e informacion necesario pa informa communidad debidamente.
Den e preguntanan cu a wordo haci a pidi minister Cicilia un biaha mas pa comparti e MoU cu parlamento. Parlamentario Dangui Oduber kier sa si gobierno di Aruba a bay di acuerdo cu TUR e condicionnan Schiphol. Tambe a puntra cua ta e condicionan cu AAA N.V./gobierno di Aruba tin pa por continua e relacion cu Schiphol Group.
Un di e diferencianan fundamental cu nos tawata tin cu Schiphol ta e hecho cu nos ta convenci cu nos tin profesionalnan local cu por maneha y lidera nos aeropuerto. Di otro banda Schiphol no tin confiansa den esey y nos ta nota cu actual prome minister Eman tampoco tin confiansa den nos mesun profesionalnan. Nos mester como Arubiano, sinñ aprecia, respeta y balora nos talentonan y profesionalnan local y mi ta sinti tanto na sr Eman como sr Cicilia nan expresionnan cu nan NO ta balora ni respeta nos yuinan di tera. Nos semper a balora y aprecia trabounan di nos profesionalnan. Nos tin hende capaz, cu experiencia y conocemento pa lidera nos aeropuerto pero mester por duna nan e oportunidad a haci esaki. Aña pasa december 2024 Schiphol Group a informa gobierno cu nan lo bandona Aruba e aña aki juli 2025. Pa es motibo nos kier sa kico ta e posicion di gobierno nobo.
Nan SI lo acepta tur e condicionnan di Schiphol?
Nan SI lo acepta pa duna Schiphol un boardseat siendo cu nan NO ta shareholder di e compania?
Nan SI lo acepta un CEO di afo atrobe?
Nan SI lo menosprecia nos propio profesionalnan??
Nan SI lo haci excepcion di e LNT pa e CEO di airport y con lo para cu ATA, APA y tur e otro entidadnan di gobierno?
Nos fraccion a haci mas di 500 pregunta na gobierno pa asina nos por informa pueblo debidamente pero gobierno no a contesta ningun pregunta ainda. Nos ta lamenta con un hoben politico manera Wendrick Cicilia ta recuri pa hiba e mesun politica anticua di su tata politico Mike Eman!
