Partido Futuro a resulta un desapunto grandi den politica y sigur den Parlamento. Hustamente e Partido cu a priminti cambio den politica, un politica nobo, un politica di nivel, un politica transparente y mihor funcionamento den parlamento, awe den funcion ta haci net contrario.
Awe Partido Futuro ta actua contra nos constitucion, viola tur regla di bon gobernacion, no tin transparencia y ta hiba un politica tradicional di insulta y atakenan personal.
Siman pasa parlamento a tene un reunion di comision central caminda mester a dicidi si parlamento ta desea di haci pregunta riba e ley di LIM. E ley aki ta e landsverordening instelling ministeries cu ta regla pa ley e responsabilidadnan di cada ministerio.
Pa e reunion aki sra Muzanin Wever a fungi como presidente di Parlamento den ausencia di presidente Marlon Sneek. Envez cu sra Wever a haci uzo di e oprtunidad pa demostra transparencia, respet pa parlamento y sigur un bon funcionamento di Parlamento a dicidi pa na un forma dictatorial kita derecho di cada parlamentario y stroba nos di haci nos trabou.
Sra Wever a habri e reunion di comision central y na e momento ey fraccion di MEP a bisa cu nos fraccion kier haci preguntanan por escrito riba e ley. Sra Wever NO a duna oido na nos peticion y a bisa cu ta MAYORIA ta dicidi y MAYORIA a dicidi cu e ley ta bay ‘blanco verslag’. Esaki kiermen cu e ley ta bay sin cu parlamento ta haci pregunta por escrito riba e ley.
Den nos constitucion ta ancra pa un ley bay sin pregunta por escrito (blanco verslag) TUR 21 miembro di Parlamento mester ta di acuerdo cu esaki. Den e caso di e ley di LIM aki obviamente fraccion di MEP NO tawata di acuerdo pa e blanco verslag y a pidi tempo pa por haci e preguntanan por escrito.
E forma con Muzanin Wever a tuma decision y actua a viola nos constitucion, el a actua robes y no a respeta peticion di fraccion di MEP pa haci preguntanan por escrito. E no tawata transparente y na un forma dictatorial kier silencia fraccion di MEP y kier dicidi unilateralmente con nos mester eherce nos funcion di Parlamentario.
Desde cuando un presidente di parlamento ta kere cu e por para y trapa riba nos constitucion? Desde cuando un presidente di parlamento por dicidi pa nos ki ora si y ki ora no nos mag di haci preguntanan por escrito?
E arrogancia y forma di trapa riba nos democracia nos ta wordo tolera y pio acepta. Nos ta urgi gobernador pa adresa e violacion di nos constitucion aki mas pronto cu ta posibel pa evita cu esaki lo ripiti. Ora pueblo vota con cu ta, bo ta haya kico cu ta y awe den parlamento fraccion di Futuro a confirma esey!
