E situacion di nos turismo no ta bayendo bon. Nos ta constata cu grado di ocupacion di hotelnan ta bahando, revpar no ta aumentando y tourism credits ta cayendo. Un indicacion cu turismo tin su retonan e aña aki. Tur luna e grado di ocupacion a baha y pa luna di augustus 2025 e grado di ocupacion a baha cu 9% den comparacion cu augustus 2024. Na augustus 2025 e grado di ocupcion tawata 74%. Es mas, esaki ta e grado di ocupacion di mas abou pa hotelnan despues di pandemia.
E proyeccionan di AHATA pa grado di ocupacion tambe a wordo husta y ta mustra cu di dos mita di aña e ocupacion lo ta mas abou di loke incialmente a wordo proyecta.
Loke ta preocupa nos mas ta e hecho cu minister di turismo Cicilia no tin vision, no tin maneho y no tin un plan di accion pa atende cu e retonan den e sector.
Nos ta mira cu e enfoke di minister Cicilia ta den cantidad y no calidad. Mientras cifranan di cantidad ta subi, grado di occupacion ta baha y tourism credits ta baha. Mientras minister Cicilia ta papia di un crecemento balansa den turismo, AAA NV ta papia di un crecemento record y esaki ta bastante confuso y contradictorio. E ta un crecemento balansa of e ta un crecemento desproporcional??
Nos ta mira crecemento explosivo for di e mercado latino americano y ta puntra nos mes si e turistanan aki ta laga mesun hopi placa atras cu e turista americano. Nos ta puntra nos mes si e turistanan aki ta hospedando na hotelnan.
Na momento cu grado di ocupacion y tourism credits ta baha ta un señal serio pa e sector hotelero. Si esaki continua lo mira medidanan contra empleadonan cu lo mester cuminsa reduci oranan di trabou y consecuentemente economia di Aruba tambe lo sinti’e.
Nos no ta sinti ningun urgencia di gobierno pa regula e sector di vacation rentals. Como ex minister di turismo nos a laga atras un ley completamente cla pa regula e sector di vacation rentals pa crea un level playing field y percura pa pais Aruba haya su fair share di e entradanan.
Mas cu 6 luna a pasa y ainda e gobierno negligente aki no a atende cu e ley aki. Ta parce cu esaki NO ta un prioridad pa nan y nan no ta considera regulacion di vacation rentals como algo urgente.
Mientrastanto casnan ta impagabel na Aruba, tur dia casnan ta wordo bendi cu stranheronan, no tin tereno mas pa nos mes hendenan y huur tambe ta impagabel. E problema di vivienda aki ta uno serio cu mester wordo atendi cune mas prome cu ta posibel. Na e momentonan aki ta casi imposibel pa un yui di tera yega na su cas paso sea no tin tereno of e prijs di casnan ta impagabel.
Nos ta expresa nos preocupacion serio con minister Cicilia ta atendiendo cu e situacion aki. Ta carece seriedad y sigur no tin liderazgo na e momentonan aki.
Turismo ta algo serio, nos tur riba e pais aki ta depende di dje y no tin tempo pa core stage mas awor aki, ta momento di accion, decision y ta momento pa lidera! Henter e pais aki ta depende di turismo. E periodo di 3 luna stage a pasa, awor ta ora pa mira accion!
