Miembro di Parlamento di AVP, Dennerich Kelly, a reacciona riba e relato anual di ARA pa aña 2020, describiendo esaki como un yamada serio pa reflexion tocante responsabilidad, confianza y liderazgo den gobernacion, specialmente den tempo di crisis.
Tin momentonan den historia di un pais unda presion, incertidumbre y miedo ta uni. E periodo di COVID-19 tabata un di e momentonan ey. Hopi hende a perde nan entrada, famianan a sinti e presion, y gobierno tabatin cu actua — y actua rapido.
“Laga mi ta cla: e ayudo tabata necesario. Pero awe, algun aña despues, nos mester haci un pregunta mas profundo: kiko esaki ta mustra nos tocante con nos ta maneha responsabilidad, confianza y liderazgo como pais?”
Segun Kelly, den un crisis liderazgo hopi biaha ta wordo midi cu velocidad. Pero liderazgo berdadero ta exigi mas cu solamente rapidez.
“Velocidad sin un estructura, ta debil. Un pais no ta wordo midi solamente pa loke e ta haci, pero mas pa con e ta hasi esaki: segun ley, cu transparencia, cu control debido y cu respet pa nos institucionnan. Asina nos ta construi y proteha confianza.”
E parlamentario a enfatisa cu confianza di pueblo, empresario y partnernan externo ta depende di un sistema cu ta demonstra cu decisionnan ta corecto, legal y controlabel. “Confianza no ta wordo construi den tempo facil, pero juist den momentonan dificil nos mester mustra esaki.”
Kelly a señala cu ora un pais ta den un crisis y no por mustra cu su maneho financiero ta transparente y controlabel, duda ta nace — y unda duda ta existi, supervision ta bira inevitabel. No como castigo, pero como consecuencia.
“Mi no ta haci acusacion. Pero e rapport di ARA ta manda un señal cu nos no por permiti di ignora. Pa traha un futuro fuerte, nos mester ta sincero tocante nos pasado.”
Segun e parlamentario, locual a pasa durante COVID-19 niun dia mester bira norma. Aruba mester aspira na un standard nobo den gobernacion publico: un standard unda humanidad y bon gobernacion no ta opuesto, pero caminda nan ta cana hunto.
“Nos no tin scoge entre rapidez y responsabilidad. Nos mester haci tur dos. Un pais fuerte ta esun cu por actua rapido den necesidad, pero cu mes momento ta proteha su base institucional, su regla y su sistema financiero. Un pais cu ta yuda hende awe, pero cu tambe ta pensa riba mañan,” asina e parlamentario a expresa. Esey p’e ta liderazgo.
“Un pais cu ta yuda hende awe, pero cu tambe ta pensa riba mañan — pami, esaki ta liderazgo. Finalmente, Kelly a enfatisa cu futuro generacionnan di Aruba ta spera mas di nan lider y representantenan: mas madurez, mas concistencia y mas responsabilidad den decisionnan cu ta tuma.
“E momento a yega pa duna e paso ey. No como politico, pero como pais. Liderazgo den tempo di crisis ta mustra kico Aruba mester di berdad-confianza, disciplina y responsabilidad,” asina Kelly a conclui.
