Parlamentario pa AVP, John Hart, ta haci un yamada firme na gobierno pa duna Parlamento di Aruba claridad riba desaroyonan di e Landspakket; en specifico, e punto di mehoracion di calidad di servicio publico y su efectividad den e aparato gubernamental. Kehonan di calidad di servicio no ta di awor. Pa hopi aña caba tin e retonan den e area aki.
Mehoracion di calidad y efectividad di e aparato gubernamental ta ancra den e Landspakket cu enfasis riba programanan, por ehempel, pa yuda empleadonan publico cu liderazgo y maneho di cambio, profesionalisacion y capacitacion y yuda departamentonan cu un maneho di formacion integral pa mehoracion di e efectividad di servicio publico.
“Departamentonan gubernamental ta existi pa sirbi pueblo, no pa complica bida di ciudadano,” Hart a declara. Berdad tin hopi reto riba capacidad di personal den e aparato gubernamental, pero tin reto tambe di reforsa liderazgo den empleadonan publico pa brinda un miho servicio” Hart a enfatisa.
“Tur persona cu pasa porta di un departamento gubernamental merece trato husto, respetuoso y profesional. Reforsa e standardnan di servicio publico ta esencial pa restaura confiansa y promove e berdadero bon comun.” Ta importante pa gobierno informa Parlamento tambe con gobierno ta atende na momento cu departamentonan no ta funcionando efectivo y no ta dunando un bon calidad di servicio.
Segun e parlamentario, tin diferente keho ta ripiti di parti di publico tocante calidad di servicio den algun departamento. E kehonan aki ta menciona falta di pasenshi, falta di profesionalismo, y hasta situacionnan caminda persona ta sinti nan mes trata cu mal beis of falta di respet.
Aunke no ta tur empleado ta comporta inadecuadamente — y Hart ta reconoce cu tin hopi funcionario cu ta cumpli cu nan trabou cu dedicacion — e echo ta cu kehonan ta ripiti ta indica cu tin un problema structural cu mester atencion serio. Ademas, tin keho tocante departamentonan caminda pueblo ta yama pa pidi informacion, pero solamente ta haya un answer machine, y ora nan sigui instruccion pa yama un extension, ningun hende no ta contesta.
Terminando, Parlamentario Hart kier enfatisa cu su rol ta pa controla gobierno y ta importante pa Parlamento di Aruba tin claridad riba asuntonan asina importante manera mehoracion di e efectividad di servicio publico conforme Landspakket.
