Durante e ceremonia protocolar riba Plaza 18 di Maart, den conmemoracion di e prome peticion pa autonomia di Aruba, Miembro di Parlamento pa AVP, Clifford Heyliger, a hiba palabra den representacion di e partido y durante esaki a enfatisa e importancia di e lucha historico pa autonomia como base di e desaroyo politico di Aruba awe.
Den su discurso, Heyliger a resalta cu Plaza 18 di Maart tin un significado profundo den historia nacional, siendo e lugar caminda e voz di pueblo Arubiano a manifesta su deseo pa mas participacion y autonomia. El a recorda e peticion historico di 1948, firma pa 2147 Arubiano, como un momento decisivo den e trayecto pa autodeterminacion .
Segun Heyliger, e accion colectivo di e epoca tabata nace for di un sinti di desbalans entre e contribucion economico di Aruba y su falta di influencia den decisionnan politico. El a explica cu, durante añanan cuarenta, Aruba a bira un centro petrolero di importancia internacional danki na actividad di e refineria, cu tabata di importancia vital durante Segundo Guerra Mundial, pero cu hopi decisionnan ainda tabata tuma centralmente, sin refleha completamente e necesidadnan di pueblo Arubiano .
Heyliger a amplia cu e contexto historico aki a crea un consenshi colectivo den cual ciudadano comun—trahadornan, comerciante, maestro y famianan— a tuma iniciativa pa participa activamente den proceso politico. Den un periodo di solamente 100 dia, sin medio moderno di comunicacion, a organisa 42 reunion pa reuni firma y manda un mensahe cla: Aruba kier determina su propio destino .
“E peticion di 1948 tabata un expresion cla di un deseo pa reconocemento, participacion y autonomia. Cada firma tabata representa un acto di compromiso civico y speranza pa un futuro miho,” Heyliger a indica.
El a destaca tambe e rol fundamental di Partido di Pueblo Arubano (AVP) den canalisa e aspiracion popular hacia accion politico concreto, convirtiendo e deseo di autonomia den un proyecto serio y sosteni.
“E logro cu nos ta disfruta awe — nos posicion constitucional y nos identidad politico — no ta coincidencia, pero resultado di sacrificio, vision y perseverancia di generacionnan cu a bini prome di nos,” el a bisa.
Heyliger a enfatisa cu e historia di e peticion di 1948 ta un recordatorio pa lidernan actual cu nan tin e responsabilidad pa continua traha na beneficio di pueblo, manteniendo e interes general como prioridad.
Na nomber di AVP, el a expresa profundo gradicimiento na tur ciudadano y lider cu a contribui na e lucha pa autonomia, reconociendo cu e fundacion di Aruba moderno ta basa riba nan esfuerzo y dedicacion.
E parlamentario a conclui cu un yamada pa sigui honra e legado di pasado cu accion den presente, construyendo un Aruba fuerte, digno y prospero pa tur generacionnan cu lo bin.
