E debate tocante aumento di salario minimo na nivel di bestaansminimum mester cuminsa cu e realidad di trahadonan cu, apesar di nan esfuerzo diario, no ta gana suficiente pa cubri nan necesidadnan basico. Esaki ta e posicion di parlamentario Clifford Heyliger, kende durante e conferencia di prensa semanal di fraccion di AVP a enfatisa cu e discusion mester conduci na decisionnan cu ta mehora bida di pueblo.
Pa Heyliger, e pregunta central ta si Aruba por sigui acepta cu un parti significativo di su forza laboral ta biba cu un entrada cu no ta permiti un bida digno.
Den e discusion publico, a expresa preocupacion tocante e impacto cu un aumento gradual den tres aña por tin riba costo laboral, prijsnan y economia. E parlamentario ta considera cu e aspectonan aki merece atencion, pero cu mester evalua nan hunto cu e consecuencia social di mantene salario bou di e nivel necesario pa biba.
“E pregunta cu nos mester haci nos mes ta si ta responsabel pa laga un gran parti di nos sociedad biba di un salario cu ta bou di e nivel necesario pa un bida digno,” Heyliger ta expresa.
Crecemento economico mester alcanza trahado tambe
Heyliger ta señala cu Aruba a conoce un desaroyo economico significativo desde Status Aparte, cu turismo como un motor importante. Sinembargo, segun e parlamentario, e prosperidad genera no a traduci suficientemente den siguridad financiero pa un gran parti di trahadonan.
E ta pone atencion riba e realidad di hende cu ta combina dos of mas trabou pa por paga nan gastonan y sostene nan famia. Pa Heyliger, esaki ta un señal cu e relacion entre salario y costo di bida mester wordo atendi.
“Pa un persona of famia por cubri su gastonan y cumpra cuminda, e mester traha dos of hasta tres trabou. Segun mi, esey no ta e Aruba cu nos a imagina nos,” e ta señala.
E parlamentario ta reconoce cu empresarionan local y internacional a contribui na crecemento economico y a beneficia di dje. Pa Heyliger, e reto ta pa percura cu e trahadonan cu ta sostene e economia tambe tin oportunidad pa comparti den e prosperidad ey.
Cifranan ta subraya e necesidad di accion
Segun e datos di Directie Arbeid en Onderzoek (DAO) cita pa Heyliger, aproximadamente 20.526 trahado ta gana un salario bou di bestaansminimum, ekivalente na 43,3% di trahadonan den sector priva.
Den sectornan manera comercio mayorista y minorista, acomodacion y servicio di cuminda y bebida, e proporcion cu e parlamentario a menciona ta supera 60%.
Pa Heyliger, e cifranan aki ta mustra cu e discusion ta trata di un reto social amplio, cu ta toca directamente e capacidad di miles di hende pa cubri necesidadnan esencial.
Sosten pa empresanan ta parti di e cambio
Heyliger ta enfatisa cu, segun e propuesta di gobierno, no ta intencion pa introduci e aumento sin su debido plan di sosten, conoci como flankerende maatregelen. Esakinan ta accionnan pa mitiga e posibel efectonan negativo di e ahuste y facilita e transicion.
E parlamentario ta sostene cu gobierno a reuni cu representantenan di comercio na diferente ocasion, pero cu, den su opinion, e intercambionan no a resulta den e cooperacion necesario pa avansa cu e cambio. E ta cuestiona, p’esey, e critica cu no a tin consulta.
Pa Heyliger, e dialogo mester produci propuestanan concreto tocante e trayectoria di aumento y e sosten pa empresanan, manteniendo e meta di un salario digno como punto di salida.
Decision politico cu responsabilidad social
Den su intervencion, Heyliger a recorda e lucha di Henny Eman pa mehora pensioen di biehez, como un ehempel di decisionnan social cu a enfrenta critica tocante sostenibilidad. Pa e parlamentario, e experiencia ey ta mustra e importancia di atende preocupacionnan economico sin bandona e necesidad di mehora bida di pueblo.
Heyliger ta considera cu Aruba mester pasa di diagnostico pa ehecucion. Rapportnan y investigacion mester sirbi como base pa accion, cu responsabilidad politico pa tuma e decisionnan necesario.
E parlamentario ta conclui cu acerca salario minimo na bestaansminimum ta un paso cu merece un debate serio y un implementacion responsabel. E meta ta un Aruba caminda e hendenan cu ta traha diariamente por cubri nan necesidadnan basico y biba cu dignidad.
