Durante e reunion reciente di comision di infrastructura den Parlamento di Aruba, presidente di e comision y parlamentario Clifford Heyliger (AVP) a comparti informacion relevante presenta pa Oranjestad Investors Group, cu ta enfoca riba e potencial pa revitalisa centro di ciudad Oranjestad.
Segun e presentacion, un di e solucion principal pa reanima actividad den centro di ciudad ta pa inverti den e renobacion y modernisacion di infrastructura urbano. E vision ta pa crea un Oranjestad mas dinamico door di traha diferente tipo di actividad economico y cultural, incluyendo museo, hospedahe tipo AirBnb, comercio, apartmento y luga di trabou.
Parlamentario Heyliger a indica cu e momento aki ta particularmente importante pa avanza cu e tipo di iniciativa aki. Entre e factornan positivo menciona ta cu actualmente tin inversionista motiva pa inverti den centro di ciudad, gobierno ta mustra un actitud proactivo, y tin introduccion di diferente iniciativa fiscal pa stimula inversion.
Segun e informacion comparti, si logra implementa tur plan, inversion total por supera AWG 250 miyon den desaroyo di centro di Oranjestad.
Sinembargo, Heyliger a indica cu inversionistanan tambe a comparti algun preocupacion y reto cu nan ta confronta. Entre esakinan ta e proceso pa obtene permiso, incluyendo permiso di construccion y permiso precario, cu segun nan por tuma hopi tempo. Ademas, e presencia di adicto y actividad ambulante den diferente parti di centro di ciudad ta bin dilanti como reto adicional pa e desaroyo di e area.
Durante e dialogo tambe a sali na cla cu tin diferente plan den desaroyo pa mehora e situacion den centro di ciudad. Entre e iniciativanan menciona ta e creacion di mas luga pa parkeer, mescos cu implementacion di sistema di camara pa aumenta siguridad den e area. Ademas, Heyliger a señala cu gobierno a crea un task force specifico pa atende e problematica relaciona cu adiccion den centro di cuidad.
E parlamentario a enfatisa cu revitalisacion di Oranjestad ta un stap importante pa fortifica economia di Aruba y pa crea un centro urbano moderno, sigur y atractivo pa residente, empresario y bishitante pareu. Segun Heyliger, e dialogo entre sector publico y sector priva ta esencial pa logra un desaroyo sostenibel di centro di ciudad.
