Cu orguyo y determinacion, Dennerich Kelly a instala oficialmente como miembro di Parlamento di Aruba, uniendo su mes na e fraccion di Partido di Pueblo Arubano (AVP). Kelly ta e incorporacion mas nobo den un grupo di parlamentario hoben, competente y dinamico, cu ta cla pa traha duro y cu determinacion pa defende e interes general di Aruba a base di un compas di moral halto.
Dennerich Kelly, kende ta enfermero profesional pa casi 25aña, ta trece cu su entrada na Parlamento un perspectiva fresco y tecnico, particularmente riba loke ta e sector di salud publico. Segun Kelly: “Mi experiencia den e campo di cuido medico ta duna mi un comprension real di e desafionan cu tanto e sector di salud, como nos pueblo, ta enfrenta. Pero mi compromiso ta pa sirbi e pueblo den su totalidad, p’esey tambe lo mi traha cu mesun forsa riba asuntonan di educacion y deporte.”
Kelly ta enfatisa cu su liderazgo no ta basa solamente riba su experiencia profesional, pero tambe riba un profundo patriotismo, balornan etico fuerte y un fe religioso cu ta guia su caminda. Esakinan ta e fundeshi di su boluntad pa cu Aruba por sigui avansa riba un base solido.
Como un representante di un generacion hoben cu ta sigui lanta su bos den Parlamento, Kelly ta determina pa mantene e conexion cu e pueblo, tende su preocupacionnan y traha riba solucion real. E ta agrega: “Pueblo mester un bos sincero y un luchado constante. Mi prome tarea ta pa sirbi, pa traha y pa representa cada Arubiano cu respet y responsabilidad.”
Fraccion di AVP ta duna un caluroso bon bini oficial na Dennerich Kelly como un refuerso valioso den su fila y ta convenci cu e lo trece energia nobo, compromiso y un sentido profundo di responsabilidad den su papel como parlamentario di e pais.
Cu e instalacion di Dennerich Kelly, e pueblo Arubano por conta riba un bos mas den Parlamento cu ta cla pa traha pa un futuro mas husto, di prosperidad comparti y sostenibel pa Aruba.
Potret: © Kabinet Gouverneur Aruba
