E discusion si ta subi salario minimo na nivel di bestaansminimum mester ta concentra riba un implementacion responsabel, cu un trayectoria cla y proteccion pa poder di compra di trahador.
Esaki ta e posicion di parlamentario ing. Carlos Bermudez, kende ta enfatisa cu un persona cu ta traha y contribui diariamente na economia di Aruba mester por cubri su necesidadnan basico y biba cu dignidad.
Pa Bermudez, e meta di un salario husto no ta cuestionabel. E tarea ta pa determina con, ki tempo y na ki manera Aruba por realisa e transicion, teniendo cuenta cu tanto e realidad di trahadornan como e capacidad di empresanan.
“Nos por discuti e ritmo, e mecanismo y e implementacion. Pero e meta mester ta cla: un salario husto pa nos hendenan y un mercado laboral caminda dignidad, respet y cumplimento di ley ta e norma,” Bermudez ta expresa.
Scucha preocupacionnan sin perde e meta
E parlamentario ta reconoce cu den sector comercial y hotelero tin preocupacion tocante e impacto di un aumento di salario minimo riba costonan operacional. E preocupacionnan aki mester forma parti di e dialogo, particularmente pa determina con por sostene empresa chikito y mediano durante e transicion.
Sinembargo, segun Bermudez, e preocupacion pa costo empresarial no por laga e realidad di trahador afo di e discusion. Un salario husto y un trato respetuoso ta elementonan importante pa un relacion laboral sano, den cual empleado y dunado di trabou por contribui na exito di e empresa.
Plan concreto di inspeccion laboral
Bermudez a expresa preocupacion tocante señal y kehonan cu e ta ricibi di trahadornan cu ta sinti cu nan ta wordo maltrata of mal uza. E parlamentario ta considera necesario pa e señalnan aki wordo investiga y atende door di e instancianan competente.
Den e cuadro aki, el a pidi Minister di Labor pa presenta un plan concreto di inspeccion laboral, cu atencion inicial pa sector hotelero, caminda, segun e parlamentario, tin diferente señal y keho cu ta merece investigacion.
E ta propone pa amplia e inspeccionnan gradualmente na tur sector, pa controla cumplimento cu ley laboral, condicionnan di trabou y derechonan di empleado.
Bermudez ta haci tambe un yamada na CUA, ATIA, AHATA y sindicatonan pa duna siguimento concreto na señalnan di posibel abuso laboral cu sin duda lo a yega na nan atencion. Pa e parlamentario, dialogo mester bay compaña pa accion y resultado.
Alcansa Bestaansminimum den tres aña
Pa haci e discusion mas concreto, Bermudez ta presenta un ehempel ilustrativo di con salario minimo por yega na nivel di bestaansminimum den tres aña.
Saliendo di un salario minimo di Afl. 11,58 pa ora, ekivalente na aproximadamente Afl. 2.007,05 pa luna pa un siman di trabou di 40 ora, e ta uza un suma di referencia di Afl. 2.697 (bestaandsminimum) pa luna pa un persona como meta den su calculo.
Cu un aumento ilustrativo di Afl. 1,33 pa ora cada aña, e trayectoria lo por ta:
• 2027: Afl. 12,91 pa ora, ekivalente na aproximadamente Afl. 2.238 pa luna.
• 2028: Afl. 14,24 pa ora, ekivalente na aproximadamente Afl. 2.468 pa luna.
• 2029: Afl. 15,57 pa ora, ekivalente na aproximadamente Afl. 2.699 pa luna.
E ekivalencianan mensual ta basa riba 40 ora pa siman y e factor di calculo di 4,333. E trayectoria ta un ehempel pa alimenta e discusion, no un schema di aumento aproba. E sumanan definitivo lo depende di e decisionnan y actualisacion di e cifranan di referencia.
Proteha beneficio pa trahador
Pa Bermudez, aumento di salario minimo so no ta suficiente. Gobierno, dunadonan di trabou, sindicatonan y organisacionnan empresarial mester sinta na mesa pa defini e transicion, e sosten pa empresanan y e medidanan necesario pa proteha poder di compra.
E ta enfatisa cu e aumento mester representa un mehoracion real pa trahador, y no wordo neutralisa door di aumentonan excesivo di prijs.
“No por construi un economia fuerte riba lomba di trahadornan cu no por biba di nan propio salario. Nos mester traha hunto pa un transicion responsabel, cu un direccion cla y cu dignidad di nos trahadornan como prioridad,” Bermudez ta conclui.
