“Nos ta na un crusada sumamente importante pa e retonan riba e mercado laboral, unda e opcionnan ta cla: sigui cu business as usual of tuma un cambio di direccion necesario.” Esaki ta e mensahe cu miembro di Parlamento John Hart, a trece diamars mainta durante conferencia di prensa di Partido di Pueblo Aruba (AVP) pa pone enfoke riba e necesidad urgente pa un reforma efectivo den nos sistema laboral.
Hart ta enfatisa cu reforma di nos mercado laboral no por tuma luga biniendo solamente for di gobierno, pero mester bay man den man cu un dialogo social structural y un supervision constante di e leynan laboral existente.
E traspaso reciente di e Ministerio di Labor pa Gabinete AVP-FUTURO ta presenta hopi reto, pero tambe oportunidad. Estudionan reciente ta lanta preocupacion tocante e dinamica actual den nos mercado laboral.
“Di un banda, companianan ta enfrenta un escasez di empleado. E realidad ta cu hopi biaha nan no ta logra haya e ‘right person for the right job’. Di otro banda, empleadonan no ta semper ta beneficia di e miho condicionnan laboral—pensa aki riba salario digno of otro beneficio cu ta motiva e trahado pa keda y crece unda e ta traha,” segun parlamentario Hart.
E ta insisti cu e pasonan cu ta necesario pa avansa, mester ta pasonan firme, riba un fundeshi cla. Hart: “Un cambio di direccion ta necesario, y e mester tuma luga riba base di dialogo social sincero. Esaki ta e unico fundeshi riba cual nos por construi solucionnan sostenibel pa e desafio cu e mercado laboral ta confronta.”
Na final di su declaracion for bibliotheek di Parlamento di Aruba, Hart ta yama atencion pa un colaboracion activo cu tur stakeholders relevante—incluyendo sector priva, sindicato, y gobierno—pa yega na un rumbo cla y duradero.
