Parlamentario John Hart ta considera cu ta tempo pa Parlamento di Aruba debati un trayectoria gradual pa acerca salario minimo na nivel di bestaansminimum. Durante e conferencia di prensa semanal di fraccion di AVP, Hart a enfatisa cu e discusion mester inclui tanto un salario cu ta permiti trahadornan biba cu dignidad como un plan pa empresanan durante e transicion.
Segun Hart, e diferencia entre salario minimo y e entrada necesario pa cubri necesidadnan basico ta un realidad cu ta exigi atencion. E parlamentario a referi na un diferencia di casi Afl. 700 pa luna y a indica cu, segun e cifranan cu el a cita, aproximadamente 20 mil trahador ta confronta cu e reto aki.
“Tin hende cu ta traha tur dia, ta cumpli cu nan responsabilidadnan, pero ainda nan salario no ta suficiente pa cubri loke ta necesario pa biba. E realidad ey nos tin cu atende,” Hart a expresa.
Un preocupacion cu ta existi pa añanan
Hart a recorda cu e discusion tocante bestaansminimum no ta nobo. El a referi na un rapport di Raad van Advies di 2023, dirigi na Gabinete Wever-Croes II, den cual, segun su exposicion, a wordo señala cu hopi hogar na Aruba tabata bou di presion financiero y cu crecemento economico no tabata traduci suficientemente den mehoracion di e situacion financiero di ciudadano, particularmente pa esnan cu menos recurso.
Den su reflexion, Hart a relaciona e presion aki cu e combinacion di costo di bida, debe, inflacion y medidanan manera aumento di BBO y introduccion di BBO na frontera.
Pa e parlamentario, e diagnostico ey ta subraya pakico bienestar di pueblo mester ta central den decisionnan economico. El a indica cu atende e situacion di hende cu ta biba bou di presion tabata un di e motibonan principal pa cual el a drenta politica.
Aumento gradual cu sosten pa comercio
Hart a recorda cu na 2025, Prome Minister y Minister di Labor a solicita conseho di Sociaal-Economische Raad (SER) tocante un aumento gradual di salario minimo pa acerca nivel di bestaansminimum.
Segun Hart, e conseho a pone atencion riba e necesidad pa tene cuenta cu e impacto pa comercio. Den e sentido aki, e parlamentario ta considera e dialogo tocante un flankerend beleid — un maneho di sosten pa empresanan — un parti esencial di e proceso.
“Den e discusion aki tin trahador, pero tin dunado di trabou tambe. Pa ambos mester tin un vision cla. Si nos kier aumenta salario minimo di un manera responsabel, nos mester papia tambe di con nos ta apoya comercio durante e transicion,” Hart a señala.
E parlamentario a indica cu e ta desea ricibi mas informacion di Minister di Labor tocante e estado actual di e preparacionnan, e pasonan cu ta wordo tuma den dialogo cu comercio y e formanan di compensacion cu ta bou di consideracion.
Debate parlamentario riba e siguiente paso
Hart a recorda cu aña pasa el a solicita presidente di Comision di Labor pa trece e tema na Parlamento. Segun e parlamentario, esaki a resulta den un intercambio cu Minister di Labor tocante e rapport di SER.
Awor e ta considera importante pa sigui cu e proceso y prepara e debate tocante e cambionan legal necesario y e fasenan di implementacion. El a distingui e cambio caba realisa pa introduci salario minimo pa ora for di e siguiente discusion: con pa acerca e nivel di e salario ey na bestaansminimum.
Pa Hart, e trayectoria di aumento y e sosten pa comercio mester wordo trata den paralelo, pa crea claridad pa tanto empleado como dunado di trabou.
Di presion pa perspectiva
Den su intervencion, Hart a menciona e aumento di reparatietoeslag y e restitucion di remedi pa pensionadonan como pasonan pa alivia presion financiero. El a destaca tambe e agenda di inversion di AIOF pa 2026–2027 y e prioridad duna na un MFA pa San Nicolas como ehempelnan di inversion den bienestar.
Pa e parlamentario, e discusion tocante salario minimo mester forma parti di e mesun direccion: un economia cu su progreso ta refleha den bida diario di pueblo.
“Nos mester sigui den dialogo y trece e debate aki na Parlamento. Na final di dia, loke nos kier ta un pais cu ta sirbi su hende, caminda un trahador por conta cu un salario cu ta permitie hiba un bida digno,” Hart a conclui.
