Na ocasion di e tratamento di presupuesto supletorio den parlamento, miembro di fraccion di Partido di Pueblo Arubano, AVP, Mervin Wyatt-Ras a recorda cu ya caba Raad van Advies a cuestiona formalmente e realidad cu e presupuesto ta basa riba dje ya cu Gabinete Wever-Croes II ta uza cifra cu no ta cuadra.
E parlamentario ta indica cu e realidad cu pueblo ta biba cu ne dia aden y dia afo ta cu inflacion a subi drasticamente y hunto cu ne e cantidad minimo pa biba. Esaki ta pone hopi ciudadano den un situacion masha preta caminda e entrada no ta suficiente y bo haya hopi di nan ta perde nan auto, nan cas, no por paga crèche, remedi, etc.
Wyatt-Ras: “Awo cu eleccion ta den porta ta bin cu un snoepje y ta bisa cu ta bin cu indexering; algo cu nan por a haci hopi aña pasa. Poder di compra di e ambtenaar a bay atras cu 18%, pero gobierno ta duna bek solamente 11.8%; riba dje parti den 6% e aña aki y e resto despues.”
Tambe ta recorda cu tin hopi mas grupo den nos sociedad cu ta pasando duro, mientras cu gobierno kier hunga Sinterklaas. E realidad ta cu Raad van Advies a describi como ‘uitzichtloos’ e situacion na Aruba. Un gobierno cu no ta inverti den mehoracion di infrastructura, ni den educacion, mientras cu si tin placa pa ministernan sigui biaha pa Dubai y Moroco y pa yuda tur nan hendenan den aparato publico.
Riba dje, segun Wyatt-Ras, tampoco ta cumpli cu e deber di presenta cuenta anual pa responsabilisa cu parlamento y sikiera purba hustifica nan malgastamento di fondo publico. Esaki ta e mesun gobierno di coalicion MEP-RAIZ cu a entrega e autonomia di Aruba. Ta keda solamente awo pa ehecuta loke Hulanda ta specifica den Landspakket.
Parlamentario Wyatt-Ras ta afirma su compromiso di sigui desenmascara e tactica di gobierno y boga pa e bienestar di e comunidad Arubiano. “Nos pueblo ta sufriendo eyfo; nos hendenan mester di sosten y nan no ta haya esey. Ta djis gaña wowo di pueblo y no ta cumpli cu e necesidad real den nos comunidad,” asina e parlamentario a conclui bisando.