Siguridad riba caminda no ta solamente un asunto di ley y castigo. Segun parlamentario Otami Thomasia di fraccion AVP, Aruba mester adopta un enfoke integral cu ta combina prevencion, educacion y proteccion pa victima.
“Hopi biaha ora un accidente grave pasa, nos ta concentra riba e investigacion y e castigo. Pero e daño mas profundo no semper ta visibel: e trauma psicologico cu famianan ta keda cu ne,” Thomasia a declara.
Un mama cu perde su yiu no solamente ta enfrenta dolor, pero un trauma cu por dura hopi aña. Un mucha cu perde su tata, ta perde stabilidad y siguridad. E shock, angustia, insomnio, rabia y culpa ta bira parti di nan bida pa largo tempo. Si e conductor responsabel no tin seguro, e famia tambe ta enfrenta e ora ey un presion financiero. Asina e victima ta bira dobel victima: emocional y financiero.
P’esey, parlamentario Thomasia a presenta un mocion pa crea un Fondo di Garantia pa Victima di Trafico, un mecanismo di proteccion pa asina famianan no ta keda nan so den e momento mas dificil di nan bida. “Siguridad vial ta un tema humano. Ta salud mental. Ta stabilidad di comunidad,” e ta enfatisa.
Alabes, Thomasia ta pone enfoke riba prevencion structural como solucion mas duradero. Segun e parlamentario di AVP, si nos pais ta serio riba reduccion di accidente, cambio di mentalidad mester cuminsa na scol.
“Ley fuerte ta necesario y apoyo pa victima ta esencial. Pero si nos no cambia actitud y conciencia desde tempran edad, nos lo sigui reacciona despues di tragedia,” el a bisa.
Fraccion AVP ta propone pa educacion vial bira un parti structural di curriculum nacional, tanto na scol primario como secundario. Respet pa regla, balor di bida humano, empatia pa otro usuario di caminda y comprension di consecuencia real di maneho imprudente mester wordo cultiva como balor permanente.
“Un hoben cu compronde e impacto real di velocidad excesivo of alcohol tras volante lo pensa diferente ora e ta sinta tras di stuur. Cambio cultural ta cuminsa cu educacion,” Thomasia a conclui.
Segun AVP, solamente ora nos integra ley, apoyo social y educacion den un enfoke coherente, nos no solamente ta responde na un problema actual, pero nos ta traha activamente pa cambia futuro di nos pais.
