Miembro di Parlamento Otami Thomasia a participa e siman aki den un reunion di comision fiho di Parlamento cu liderazgo di Aruba Tourism Authority (A.T.A.), unda e enfoke principal tabata futuro di turismo na Aruba y e necesidad pa un cambio di direccion pa sigura bienestar duradero pa nos isla y su residentenan.
Durante e reunion, A.T.A. a reconoce cu Aruba a yega na un punto decisivo. Maske turismo a trece hopi beneficio economico durante decenia, e tin un impacto tambe cu ta sinti wordo sinti cada dia mas den bida di nos hendenan.
A.T.A. tambe a presenta un informe amplio tocante nan esfuerzo di destination development, cu mas cu 20 punto concreto cu ta inclui mehoracion y mantencion di infrastructura turistico, huntu cu medidanan enfoca riba proteccion ambiental, conservacion y regeneracion di nos recursonan natural. Ta mustra cu e autoridad ta trahando activamente pa crea un modelo di turismo mas balansa y responsabel, cu respet pa nos ambiente natural y social.
Segun e Plan Corporativo 2026 di A.T.A., sigui crece cu mas turista no ta automaticamente nifica mas beneficio pa Aruba. Al contrario, e plan ta cla den su vision: nos mester move for di un modelo di “mas cantidad” pa un enfoke di “mas calidad”. Esaki ta implica atrae bishitantenan cu respeta Aruba, cu ta aporta mas balor na economia local y cu no ta pone presion adicional riba nos recurso natural y social.
Parlamentario Otami Thomasia ta subraya cu hopi residente ta sinti cu turismo no ta mescos cu prome. Infrastructura ta sobrecarga, beach ta yen y ta pone un presion enorme riba nos naturaleza, mientras ta afecta directamente nos calidad di bida. Den e sentido ey, e enfoke nobo di A.T.A. riba proteccion di nos isla ta esencial: proteha nos cultura, nos medio ambiente y nos manera di biba.
“Turismo mester traha pa tur hende, no solamente pa algun sector so,” a indica Thomasia. “Un sector turistico fuerte mester cana huntou cu bienestar social y ambiental. Si nos pueblo no ta sinti e beneficio, e modelo no ta sostenibel.”
E mensahe principal for di e sesion ta cla: Aruba no ta solamente un destino pa bishita, Aruba ta nos cas. Nos ta comparti nos isla cu nos bishitantenan, pero e responsabilidad pa proteha Aruba ta comparti tambe. Un Aruba dushi pa biba ta automaticamente un Aruba dushi pa bishita.
Otami Thomasia a reafirma su compromiso pa sigui participa activamente den e dialogo cu A.T.A. y otro stakeholdernan, pa impulsa un modelo di turismo mas balansa, responsabel y enfoca riba e mañan di Aruba y su pueblo.
