Parlamentario Sra. Jennifer Arends-Reyes, den calidad di presidente di e comision di turismo di Parlamento di Aruba, a participa recientemente den un presentacion tocante e progreso y desaroyonan di Gateway 2030, un proyecto strategico di gran relevancia cu ta defini e rumbo di modernisacion di infrastructura clave di Aruba.
Durante e presentacion a confirma cu Aruba ta tumando pasonan concreto den e implementacion di Gateway 2030, cuminsando cu e introduccion di self check-in kiosknan y un sistema automatico di maneho di ekipahe. Esaki ta representa no solamente un inversion financiero significativo, pero tambe un señal cla cu Aruba ta asumi su responsabilidad pa modernisa su porta principal di entrada, reduciendo tardansa y mehorando e experiencia di biahero, specialmente pa esunnan cu pre-clearance pa Merca.
E proyecto Gateway 2030 ta basa riba un vision, cu enfoke riba eficiencia, sostenibilidad y capacidad institucional. E plan ta contempla optimisacion di proceso, fortalecemento di conectividad y creacion di un infrastructura robusto cu ta sostene e crecemento di turismo y actividad economico, teniendo na cuenta e bienestar di nos comunidad y nos medio ambiente. Gateway 2030 ta un proyecto cu ta toca directamente e interes di nos pueblo. Como parlamento, nos tin e responsabilidad pa monitor, evalua y ta informa den cada fase di su ehecucion.,” asina Sra. Arends-Reyes a declara.
Segun e parlamentario, e siguiente fasenan di Gateway 2030 lo por trece cierto cambio temporario y ta pidi comprension di antemano na usuarionan pa motibo cu lo tin construccion activo den cierto areanan. Sin embargo, e a destaca cu e liderazgo politico tin e obligacion pa pensa y actua riba largo plazo. “Cada etapa cu ta completa ta un paso firme pa un Aruba mas fuerte, mas competitivo y miho prepara,” a agrega.
Cu su participacion, Sra. Jennifer Arends-Reyes ta reafirma su compromiso pa eherce un rol activo den seguimiento di Gateway 2030. Hunto cu e Comision di Turismo, el a bishita e Aeropuerto Reina Beatrix na april di aña pasa y, den e periodo siguiente, a constata progreso concreto y desaroyonan nobo. Ta proyecta mas bishita y presentacion cu gruponan di parlamentario pa garantisa intercambio di informacion efectivo.
Sra Jennifer Arends-Reyes lo sigui pendiente riba e ehecucion di Gateway 2030, cu interes di Aruba y su pueblo como prioridad. Cada fase cu ta completa no ta solamente un logro tecnico, sino un stap importante cu ta confirma e ambicion di Aruba pa sigui ta pionero den Caribe.
