Segun Tromp-Lee desde cu dia 7 di oktober 2020 e la reuni cu 2 representante di e grupo di Instructornan di Landamento di Landamento Escolar, e la bin ta pidi atencion di Gobierno pa e grupo meta aki. Nan a acerca su persona pa por plantia nan preocupacion y alabes duna splicacion di e situacion cu nan tabata aden. Tabata trata di un grupo di alrededor di 20 trahador cu desde 2 di september 2020 tabata bibando den inseguridad y a acerc’e como Parlamentario pa yudanan haya claridad y transparencia for di Gobierno.

Tromp-Lee ta indica cu durante e reunion aki diferente punto a keda trata e.o., nan rechtspositie (contract, nombracion fiho, plan nobo/losse uurtjes, salario), ‘bezuinigingsronde’ di gobierno, Programa Landamento Escolar: diferente investigacion y intencion pa cambio di maneho di parti di e ex-minister di Enseñansa. A base di e reunion aki y tur documento ricibi, Parlamentario Tromp-Lee di e tempo ey a para pa e grupo aki y pa e Proyecto Landamento Escolar. Un Proyecto cu a demostra di ta necesario y cu pa 29 aña a keda realisa exitosamente.

Na su salida como Minister ainda sr. Lampe a crea un situacion hopi fastioso pa cu e salario di e Instructornan di Landamento y no a percura pa e fondonan necesario pa e Proyecto por a inicia na comienso di e aña escolar 2021-2022. Algo cu Tromp-Lee ta lamenta masha hopi mes.

Un di e prome puntonan cu Tromp-Lee a trata cu Minister Endy Croes tabata e situacion di e Instructornan di Landamento y e necesidad pa percura pa e lesnan por start pa e aña escolar aki. Awe 14 di oktober 2021 e prome lesnan a inicia y nos muchanan tabata feliz y nos instructornan tin trankilidad na pia di trabou. Tromp-Lee ta finalisa bisando cu e ta contento cu Minister Endy Croes a sa di logra esakinan den un corto tempo. Dunando asina nos muchanan e oportunidad pa por siña landa y obtene un diploma cu ta hopi importante y necesario mirando cu nos ta biba riba un isla.

LEAVE A REPLY

Please enter your comment!
Please enter your name here