Despues di tres luna di retraso riba e fecha priminti y un falta preocupante di informacion di parti di Gobierno, Parlamentario Shailiny Tromp-Lee a manda un serie di 15 pregunta critico na Minister di Labor, Sr. Wendrick Cicilia. Tromp-Lee pa cuestiona e falta di transparencia y e falta di cumplimento cu e mandato di Parlamento pa introduci e salario minimo pa hoben entrante 1 di januari 2026, un instrumento vital pa brinda proteccion na nos hubennan.
Un promesa kibra
E proceso aki tin su base den un mocion cu a keda aproba unanimamente pa Parlamento dia 1 di september 2025. Den sala di Parlamenro e dia ey, Minister Cicilia a duna su palabra formal cu e lo a percura pa e introduccion di un salario minimo pa hoben entrante 1 di januari 2026. Pa e motibo ey, Parlamentario Tromp-Lee a actua di buena fe y a opta pa retira (trek in) un amienda cu e mes a presenta pa percura pa e proteccion aki.
“Awe, nos ta tres luna laat y e hubentud trahado di Aruba ta keda sin e proteccion legal cu nan merece. E silencio di e Minister ta un kiebro di e confianza cu el a pidi Parlamento,” Tromp-Lee a subraya.
“Mi a actua di buena fe y a retira mi amienda basa riba e promesa di e Minister. Awe, tres luna despues di e fecha palabra, nos ta observa un silencio preocupante y un falta di accion total,” Tromp-Lee a expresa. Segun Tromp-Lee e la brinda 3 luna adicional di espacio na Minister y te ainda nada, ni update ni cumplimento.
Falta di transparencia
Segun e Parlamentario, e proceso ta wordo maneha sin duna transparencia of nos por conclui cu nada no ta tumando lugar. Entre september y december 2025, Tromp-Lee a manda carta pa pidi informacion di progreso pero e Minister a scoge pa ignora esaki cual a conduci cu Tromp-Lee mester a manda un recordatorio pidiendo un biaha mas informacion riba e progreso,. Tabata unicamente durante e debate di presupuesto na december ultimo, cu e Minister a admiti cu e proceso a stagna debi na un conseho di SER, cual el a entrega solamente despues di un peticion oficial di e Parlamentario.
“Ta inaceptabel cu Parlamento mester ‘ranca’ informacion for di e Minister riba un topico asina importante. Su deber constitucional ta pa informa Parlamento pro-activamente, algo cu no a sosode den e dossier aki,” e Parlamentario a subraya.
Decision ehecutivo: No tin excusa pa retraso
Tromp-Lee ta aclaria cu e introduccion di e salario minimo pa hoben no mester di un ley nobo, sino unicamente un Landsbesluit, houdende algemene maatregelen (LBham). Esaki ta nifica cu e implementacion ta depende puramente di e firma y e boluntad politico di e Minister.
Ademas, e Parlamentario ta recorda cu e propio departamento di e Minister, Directie Arbeid & Onderzoek (DAO), a conclui den nan nota di september 2025 cu e introduccion ta necesario pa proteha nos hobennan y cumpli cu normanan internacional. Actualmente, Aruba ta keda como e unico pais den henter Reino Hulandes cu te ainda no tin e proteccion legal aki pa su hobennan di 15 pa 17 aña. Algo cu Aruba completo a kere lo bira un realidad y asta a “celebra” e decision dia 1 di September 2025 ora Parlamento a aproba cambio di ley pa introduci un salario minimo pa ora entrante 1 di janauri 2026 y a keda palabra cu riba e mesun fecha lo introduci un salario minimo pa hoben.
15 Pregunta Critico
Den su carta oficial, Tromp-Lee a formula 15 pregunta critico, caminda e ta pidi splicacion riba e silencio di e Minister, y kico ta e “deadline” final pa e Landsbesluit aki drenta na vigor. Alabes e ta puntra dicon e argumentonan di SER a wordo uza pa “freeze” e proceso en bes di implementa un maneho paralelo of bin atende esakinan cu Parlamento.
“E tempo di sconde tras di rapport/consehonan y ignora e mandato di Parlamento a pasa. Nos hubentud no por keda warda mas riba un firma cu mester tawata t’ey caba. Mi ta wardando e contesta di e Minister den un plaso hopi corto,” Tromp-Lee a conclui.
