Diamars 15 di September 2026, den un ambiente solem y yena cu entusiasmo, e miembronan nobo di Parlamento Hubenil di Aruba a huramenta oficialmente den sala di Parlamento di Aruba. E acto aki ta marca e inicio di un trayecto di formacion di suma importancia pa e hobennan cu a scoge pa asumi un papel activo den e Fundacion di Parlamento Hubenil.
Parlamentario Shailiny Tromp-Lee a expresa su mas caluroso pabien na e hobennan, destacando e impacto profundo cu e plataforma aki tin riba e desaroyo di liderazgo na Aruba. Desde su creacion na aña 2003, Fundacion Parlamento Hubenil ta duna hobennan entre 14 y 23 aña e oportunidad pa siña entre otro tocante e proceso legislativo, e structura di nos estado, y e responsabilidad di sirbi comunidad.
Un Plataforma pa siña y lidera
Segun Parlamentario Tromp-Lee, forma parti di Parlamento Hubenil ta mucho mas cu un honor. “E ta un scol pa bida, un plataforma caminda nos hobennan ta siña debati, dialoga, y busca solucionnan pa e retonan cu nos sociedad ta enfrenta. Ta un espacio pa descubri e berdadero poder di nan voz y pa compronde cu nan ideanan tin balor. Un Plataforma cu ta crea futuro lidernan pa nos sociedad.”
E experiencia aki ta duna e miembronan nobo e hermentnan pa:
- Conoce e proceso democratico y e structura di nos pais.
- Expresa nan ideanan, inkietudnan y vision directamente y sin miedo.
- Formacion y desaroyo personal
- Desaroya un liderazgo basa riba curashi, empatia y trabou den ekipo pa e bienestar general.
E presente di Aruba
Parlamentario Tromp-Lee ta manda un mensahe di curason na e hobennan, enfatisando cu nan rol den e desaroyo di Aruba ta cuminsa awe mes. “Nos no por sigui mira e hubentud simplemente como e futuro. Nos hobennan ta e presente di Aruba! Nos mester sigui brindanan e espacio pa wordo scucha, y ta parti di e solucion. Nos mester sigui traha pa un rumbo mas inclusivo, innovativo y dinamico pa nos pais.”
E plataforma cu Parlamento Hubenil ta brinda nos hobennan ta importante, pasobra liderazgo no ta solamente trata di tuma decision. Ta trata tambe di siña scucha, dialoga, forma amistad, respeta opinionnan diferente y busca solucion hunto pa loke ta importante pa nos comunidad.
Segun Tromp-Lee e hobennan ta nos futuro. Nos mester sigui duna nan un voz, stimula nan pa expresa nan opinion y guia nan pa sa unda y con nan voz por wordo scucha. Esaki sigur lo ta un inversion den un comunidad mas fuerte y un futuro mihor pa nos tur. P’esey segun e parlamentario nos mester anima e hobennan pa saca e maximo beneficio di e trayecto aki.
Pa termina e parlamentario a termina cu un mensahe pa e hobennan: “Siña, puntra, tende, dialoga y expresa boso voz. Nunka tene miedo di presenta boso ideanan. Aruba tin mester di hobennan cu curason, vision y curashi pa lidera. Mi ta desea tur e hobennan hopi exito den e periodo nan dilanti y tuma e oportunidad pa descubri e poder di bo mesun voz”.
