Parlamentario Drs. Shailiny Tromp-Lee: Tres berdad ta igual na cero berdad! Aruba merece transparencia real riba uzo di jet priva

Durante e reunion publico di dia 11 di mei ultimo, Parlamentario Tromp-Lee a expresa su desapunto profundo ora cu Minister Gerlien Croes un biaha mas a nenga di duna claridad riba e uzo di un jet priva. No obstante cu tanto oposicion como colega di coalicion, sr. De Meza (AVP), a pidi splicacion, e mandatario a opta pa keda den silencio, reforsando loke Tromp-Lee ta describi como un “Crisis di Integridad”.

Un Mandatario cu “Tres Berdad”

Pa Tromp-Lee, e situacion rond di e jet priva no ta un asunto insignificante, sino un falta di respet pa e institucion di Parlamento y pa pueblo di Aruba. Durante su desertacion, el a enfatisa cu integridad no por ta un discurso di campaña so, sino cu e mester keda demostra cu accionnan coherente. “Nos tin un situacion caminda un mandatario a duna tres version diferente di e mesun echo: prome el a bisa cu el a pag’e for di su mesun saco, despues cu e tabata un ‘lift’ gratis, y awor cu nan a split e gasto. Den matematica di integridad, tres berdad ta igual na cero berdad,” Tromp-Lee a declara.

Silencio y Obstaculo

E Parlamentario a cuestiona e falta di transparencia structural den e maneho aki. Te cu awe, Fraccion di MEP a manda un total di 106 pregunta pa Gobierno riba e topico aki, sinembargo, apesar di e recordatorionan (rappel) manda, no a ricibi ni un solo contesta. Ademas, e peticionnan pa reunion cu e Minister concerni no ta keda yama pa Presidente di Parlamento, no obstante e numeroso recordatorionan.“Un mandatario cu no tin nada di sconde ta habri su buki mesora. Esun cu ta sconde tras di silencio y abogadonan (LOB) ta crea e impresion fuerte cu tin algo masha serio mes cu no por mira luz di dia,” e Parlamentario a enfatisa.

Exigencia pa Prueba Verificabel

Parlamentario Tromp-Lee a conclui su posicion exigiendo documentacion concreto.  Pa trece un fin na e charada aki y restaura un poco di e credibilidad perdi. El a exigi pa e Minister presenta:

1. E factura oficial di e compania di aviacion concerni.

2. E comprobante di banco (bankafschrift) cu ta sirbi como prueba contundente cu e placa a sali efectivamente for di e cuenta personal di e Minister.

“Transparencia no por ta un menú “à la carte” caminda boso ta scoge kico y ki ora boso ta trata asuntonan di interes general. E la termina bisando cu transparencia no ta un opcion, pero un obligacion!