E situacion di e adictonan ambulante den nos centro di ciudad ta keda un problema grave, deplorabel y urgente. Nos ta mira y scucha dia tras dia con comercio ta sufri, turismo ta afecta y e imagen di nos pais ta deteriora. E ta un tema cu nos no por sigui tap’e. Luna pasa, fraccion di PPA a trece e preocupacion aki dilanti y awe Eduard Pieters di fraccion di PPA, kier sigui insisti cu gobierno mester actua den un forma integral, humano y duradero.
Un problema hopi mas profundo cu djis sushi riba caya
Segun e comerciantenan di centro di ciudad, ya e desafionan no ta solamente di benta of parkeo, sino e teror cu e adictonan ambulante ta causa. Nan ta menasa e clientenan, ta exigi placa pa cuida auto, ta haci daño na edificio di negoshi y ta laga un sushi atras cu ta refleha un imagen hopi mahos pa nos pueblo y turismo. Despues cu Cuerpo Policial Aruba haci un limpieza cosmetico, e realidad ta mustra cu sin un plan integral, nos ta bolbe na punto di inicio. Ta e mesun situacion, mesun adictonan ambulante, mesun daño.
“Esaki ta mustra cu nos no por trata e problema aki superficialmente. Un adiccion ta un malesa mental, no un crimen. Esnan cu ta riba caya mester haya cuido, guia y rehabilitacion, no solamente castigo. Nos ta papia di hende cu un historia, cu un mama, tata of yiu atras. Ningun hende ta nace cu deseo pa bira adicto, pero hopi ta cay den un abismo y desesperacion. P’esey como pais nos tin un obligacion moral y humano pa yuda nan, no pa sigui lubida nan,” Eduard a enfatisa.
Un Ley y Un Plan Integral Pa Rehabilitacion y Reintegration
Segun Eduard: “Den nos plan Aruba 2050, PPA a presenta un vision cla: mester tin un programa nacional obligatorio di rehabilitacion cu traha man den man cu sector priva y un plan di reintegracion pa crea cupo di trabou. Asina, unbes un persona sali for di centro di rehabilitacion, e tin un adres, stabilidad y un oportunidad real pa cuminsa di nobo”.
Den e carta oficial cu Eduard a manda na Minister di Salubridad, Wyatt-Ras, dia 22 di october 2025, el a formula pregunta crucial riba e ley y e maneho integral pa trata e adictonan ambulante. “Nos kier sa unda e ley ta, ki ta e contenido, ki tempo ta presenta na Parlamento, y con lo garantisa un admision obligatorio den institucion profesional pa cuido y rehabilitacion. Nos a pidi tambe un analisis concreto riba beneficio, desbentaha y gasto financiero pa crea un centro di rehabilitacion na Aruba mes, en bes di manda nos hendenan na exterior. Ta di lamenta cu ya ta birando casi cuater siman y ainda nos no a haya contesta. Esaki ta sumamente lamentabel, mirando cu mientras nos ta warda, nos centro di ciudad ta sigui hoga den caos y falta di control.
Pa un Aruba cu ta cuida su pueblo
E momento a yega pa trece dignidad bek na nos centro di ciudad y speransa bek den nos pueblo. Nos no por laga e adictonan ambulante sigui sufri sin guia, ni nos comerciantenan sigui perde. “Fraccion di PPA ta sigui insisti: un ley integral, un programa obligatorio di rehabilitacion, y un maneho humano y sostenibel ta e unico caminda pa un solucion real. Nos no mester di mas limpieza cosmetico, sino un cambio structural, humano y permanente. Paso un pueblo cu ta cuida di su mas vunerabelnan, ta un pueblo cu tin futuro,” Eduard Pieters a finalisa bisando.
