Durante e ‘vragenuur’ di diabierna mainta na Parlamento fraccion di PPA a dirigi 3 pregunta critico y skerpi na Minister di Husticia, sr. Arthur Dowers. Parlamentario Eduard Pieters, a uza e oportunidad pa pone riba mesa un tema cu ya ta bati consciencia di henter e pais: e deterioro serio di seguridad di trafico na Aruba. E preocupacion aki no ta oportunista ni emocional; ta basa riba e realidad reciente, riba dato empirico y riba e tragedianan cu a costa varios bida humano.
Comportacion iresponsabel for di december
“For di december caba, PPA ya a ripara cu comportacion di trafico ta empeorando visiblemente. For di prome cu recess parlamentario a cuminsa, fraccion di PPA a tuma iniciativa pa papia cu varios experto di trafico, evaluando kico ta fayando y con fraccion di PPA por contribui na un manera constructivo pa mehora seguridad. PPA tambe a cuminsa haci varios pregunta skerpi y concreto na minister, pa exigi claridad, planificacion y accion,” Eduard a señala.
Problema di comportacion structural
E vragenuur di awe a pasa den un contexto sumamente doloroso. Sinta eyden ta tende di un accidente serio di brommer y otro accidente di e anochi anterior dilanti warda di polis na San Nicolas. E casonan aki no ta incidente isola; nan ta sintoma di un problema di comportacion di trafico structural. Pieters a enfatisa, cu e actitud di nos propio hendenan den trafico ta laga hopi di desea, pero conducta individual no por ta separa di un sistema cu no ta preveni, no ta controla y no ta sanciona suficiente.
Un maneho integral y rapido
Den sala di reunion, Pieters a ripiti cu seguridad di trafico mester ta algo holistico, basa riba tres pilar: ingenieria, aplicacion di ley y enseñansa/conscientisacion. Sin e tres pilarnan aki hunto, cualkier medida lo keda fragmenta y inefectivo. Den ingenieria, el a recorda cu ya tin borchi di limitacion di velocidad for di bebouwde kom, pero a haci un yamada urgente pa pone mas di e borchinan di bebouwde kom pabou di brug tambe, pa prohibi velocidad superior di 80 km pa ora, reduciendo riesgo real di accidente na un punto critico.
Aplicacion di ley
Pa loke ta aplicacion di ley, PPA ta cla: “Aruba mester mas polis riba caya, mas control activo y inversion den overtime. Deteccion di velocidad (Flitspalen) y presencia visibel di polis no ta castigo, sino prevencion. Hende su bida no tin prijs y ningun costo presupuestario no por pisa mas cu bida humano. Aruba no por sigui acepta fatalidad manera “prijs di progreso,” Eduard a señala.
“Omgevingsprikkel”
Den enseñansa, Pieters a pone enfasis riba un punto crucial: conscientisacion no kiermen paga un cantidad barbaro di placa pa pone propaganda den media, anto yama esaki un campaña. “Conscientisacion ta omgevingsprikkel: e borchinan strategico, poni den señal cu ta obliga hende lesa, ripiti y interiorisa e mensahe. Ta condiciona conducta pa, na momento decisivo, consenshi di conductor realmente traha y actitud por cambia”.
Coalicion cu actitud inmaduro
Eduard Pieters a indica cu e ta di lamenta masha cu, un biaha mas, cierto representante di coalicion a mustra actitud inmaduro, purbando di minimalisa e problema y bisa cu trafico insigur “no ta di awor”. Nan kier mane ignora cu tabatin eleccion y cu e mesun coalicion aki ya tin mas di ocho luna den gobierno. Ora nan tabata den oposicion, nan a critica; awor nan tin poder pa actua. “Kico realmente boso ta bay haci?” Ta e pregunta cardinal cu Eduard Pieters ta haci na minister.
Finalmente Pieters a subraya cu Minister Dowers a bolbe menciona formacion di un comision interdepartamental y cu resultado lo bin den dos siman. Fraccion di PPA lo keda atento y vigilante: kico ta mandato di e comision, kico ta e accionnan concreto, y con e resultado lo traduci den medida inmediato. Aruba no por permiti ni un morto mas den trafico. Seguridad di trafico ta un prueba di gobernacion serio. E momento pa accion ta awor!
