Durante e di dos tanda, Parlamentario Eduard Pieters di fraccion di PPA a presenta su preocupacion: “Señor presidente, awe mainta nos por a ripara cu e wega di poder den e matrimonio AVP–FUTURO ta sigui.” Cu e observacion aki, Eduard Pieters a pone palabra riba un realidad cu ya no por disimula. Aruba ta mira, en bibo, con un coalicion cu tabata mester goberna ta keda atrapa den desconfiansa, contradiccion y falta di direccion, na un momento historico cu liderazgo serio ta mas necesario cu nunca.
Un Mocion Sin Union
E hecho cu fraccion di AVP, sin su partner FUTURO, a entrega un mocion pa urgi gobierno pa nombra un minister plenipotenciario, ta revelador. “Mihor laat cu nunca,” ta e dicho popular. Pero segun Pieters, esaki ta “incomprendibel y intolerabel” ora bo mira loke ta sosode den Reino Hulandes y den nos region. Un gobierno cu ta discuti si e cargo ta necesario, mientras e mesun ministernan ta contradici otro publicamente, ta un gobierno sin coordinacion y respet interno.
Dos version, un Gobierno
Minister Gerlien Croes ta declara cu un minister plenipotenciario ta costa demasiado placa; Prome Minister Mike Eman ta bisa cu e nombramento ta necesario. “Banda di e condicionnan stipula y e lucha di poder, no tin comunicacion,” Pieters a enfatisa. E situacion a bira tan absurdo cu lider di fraccion di FUTURO ta cuestiona Prome Minister, en bes di dialoga cu nan propio partner di coalicion. Segun Pieters, “aki nos por conclui cu e pleito den e matrimonio ta den un estado basta avansa.”
Desconfiansa institucional
E insistencia di AVP riba e mocion, a pesar di e supuesto acuerdonan interno, ta confirma, “un desconfiansa total entre AVP y FUTURO,” segun Pieters. Cu aprobacion di e LIM, Prome Minister lo perde e rol central den e Relacionnan di Reino y e mocion pa un minister plenipotenciario ta bira un tipo di “vigilancia politico.” Esaki no ta gobernacion; esaki ta supervivencia politico.
E amienda: Igualdad den Reino
Pieters a cambia e enfoke pa un punto di principio: igualdad den Reino Hulandes. “Igualdad den Reino ta algo cu cada pais tin cu lucha p’e,” el a bisa. E amienda proponi ta basa riba articulo 39 di e Statuto di Reino y ta corigi un desigualdad serio: e falta di proteccion legal moderno pa e ministernan y parlamentario di Aruba, Corsou y St. Maarten, comparabel cu Hulanda.
E amienda no ta crea inmunidad. “E no ta pa vrijwaring,” Pieters a aclara. E ta stipula un procedura claro, independiente y neutral, via e Procurador General di e Hoge Raad, den liña cu e tratadonan internacional manera IVBPR y EVRM. Esaki ta preveni persecusion cu motivacion politico y proteha integridad institucional den un comunidad chikito, unda por destrui reputacion hopi facil.
Aruba no ta den un momento pa e weganan di poder. Den un mundo yena di tension geopolitico, nos mester claridad, unidad y respet pa principio. “PPA hamas lo permiti pa ningun hende abusa di nos principionan,” Pieters a declara. E yamada ta cla: menos lucha interno, mas responsabilidad. Pueblo di Aruba no kier poder; pueblo di Aruba kier un rumbo fiho y solido.
