Un maestro ta para dilanti klas, un mucha no por concentra, otro ta patras ta lesa of conta. Un otro no por regula su emocionnan. Tin mucha cu ADHD, autismo, dificultad visual of auditivo y otro cu simplemente mester hopi mas atencion individual pa por sigui e lesnan.
Y tur esaki por ta den e mesun klas, na e mesun momento, cu un maestro cu ta responsabel pa enseñansa di tur. Esey ta e realidad cu parlamentario Eduard Pieters kier Gobierno mira, ora ta papia di calidad di enseñansa.
Despues di reunion publico di siman pasa, Pieters a cuestiona Minister di Enseñansa, Gerlien Croes, particularmente despues cu, e Minister a pidie pa splica un asunto relaciona cu zorgstructuur den enseñansa. “Mi ta haya esaki hopi grave. Enseñansa no ta algo cu nos por hunga politica cu ne. Enseñansa ta futuro di e pais aki.”
Ken mester splica ken?
Pa Pieters, un Minister di Enseñansa tin un aparato profesional rond di dje: Departamento di Enseñansa, Dienst Inspectie van het Onderwijs, e profesionalnan, e conseheronan y instancia cu mester por guia maneho educativo.
Parlamento, di otro banda, tin deber di controla Gobierno. P’esey Pieters ta lansa un pregunta incomodo: “Si un Parlamentario mester splica na Minister con e sistema di cuido mester funciona, kico ta pasando cu e conseho profesional rond di su ministerio? Y si e conseho ta existi, Minister ta scuch’e?”
Realidad di klas a cambia
Pieters su mensahe ta toca directamente e realidad cu hopi maestro ta reconoce. E maestro di awe no ta solamente dunando les. E ta tratando di mantene atencion di un klas, atende diferencia grandi den nivel, guia mucha cu dificultad di comportacion, yuda un alumno cu no ta domina e habilidadnan basico, calma otro cu no por regula su emocion y na mesun momento, garantisa cu e resto di klas ta sigui siña y haya les di calidad. Tin momento cu un mucha mester atencion uno-pa-uno, pero tin otro mucha wardando riba e mesun maestro.
Esey no ta falta di boluntad di maestro. E ta un realidad educativo, cu ta exigi otro tipo di sosten.
P’esey Pieters ta cuestiona si Aruba ta inverti suficientemente den e profesional, cu cada dia mester maneha e diversidad compleho ey.
Un diploma no por ta final di formacion
Segun Pieters, maestro no por termina su formacion despues di cuatro of cinco aña y wordo laga su so cu un klas, cu ta cambia constantemente.
E ta boga pa formacion continuo: no solamente curso di materia di idioma, sino capacitacion practico pa maneha un klas diverso, pa reconoce e necesidadnan diferente y sa con pa actua.
Pero e capacitacion su so tampoco ta suficiente. E maestro mester tin un sistema rond di dje: leerlingenzorg, guia interno, direccion escolar y acceso na e profesionalnan specialisa, cu por interveni ora cu tin necesidad di un mucha.
Mas di 200 profesional: scucha nan
Pieters a recorda cu, mas di 200 profesional a contribui anteriormente na trabou rond di e visiestuk di zorgstructuur, basa tambe riba investigacion y cooperacion externo.
P’esey su critica ta directo: “No cambia sistema educativo simplemente pa cambia. Analisa. Planifica. Y scucha e profesionalnan cu conoce e klas y nos realidad na Aruba”.
Problema di enseñansa di awe por bira problema social di mañan
Pa Pieters, esaki ta hopi mas grandi, cu un discusion den Parlamento.
Un mucha cu no haya sosten awe, no ta desaparece for di sistema mañan. Problema cu no ta atendi na tempo, por crece hunto cu e mucha. P’esey e ta conecta inversion den enseñansa cu prevencion social, sosten di famia y hasta e lucha contra delincuencia.
E pregunta politico, pues, no ta solamente si Aruba tin suficiente maestro. Ta si nos ta pidi maestro carga cada bes mas responsabilidad, sin duna nan suficiente formacion, sosten y profesionalnan rond di nan pa yuda carga e responsabilidad ey. Y ey ta unda Pieters su mensahe na Gobierno ta bira dificil pa ignora: “Si nos kier un mihor Aruba mañan, nos no por sigui laga maestro su so cu e problemanan di awe”.
