Gobierno ta presenta consulta cu e gremionan comercial y sindical como parti di su proceso pa aumenta salario minimo. Pero segun parlamentario Eduard Pieters (PPA), tin un diferencia fundamental entre informa un sector y realmente dialoga cu ne. Durante conferencia di prensa, Pieters a cuestiona e manera cu Gobierno ta caracterisa su comunicacion cu e representantenan di e sectornan afecta.
“Dialogo ta dos banda, no un presentacion!”
Pieters a señala cu, segun informacion cu PPA a ricibi, e representantenan comercial a participa na un encuentro, caminda Gobierno a presenta informacion y posteriormente a permiti pregunta. Pero e ta cuestiona si e proceso ey por ta considera como un dialogo genuino.
“Dialogo ta ora tur dos banda por aporta, discuti y influencia e resultado. No ora un banda ta presenta y e otro solamente por haci pregunta, pero cu limitacion.”
Pa Pieters, un encuentro informativo no ta automaticamente nifica cu e sector a participa den formulacion di politica.
“Ken a participa den preparacion di e plan?”
Pieters a cuestiona si e gremionan a wordo involucra den analisis di e alternativanan, impacto economico y forma di implementacion. Segun Pieters, e representantenan comercial a indica claramente, cu nan no a participa den niun preparacion di e plan, manera Gobierno ta sugeri of pretende. “Si e sector no a participa den formulacion di e plan, Gobierno mester ta transparente tocante e alcance real di su consulta.”
Consenso no ta algo cu Gobierno por anuncia unilateralmente
Pa Pieters, e discusion ta mas grandi cu salario minimo. E ta toca credibilidad di proceso di decision publico. Un Gobierno por consulta y despues tuma un decision diferente for di e recomendacionnan ricibi. Pero e mester distingi esaki claramente entre kico el a haci, sea ta un consulta, acuerdo y/of consenso. “No por presenta participacion como si fuera ta un aprobacion.”
P’esey Pieters ta pidi claridad riba e proceso y e contribucion di cada sector. Pasobra dialogo social no ta un formalidad pa Gobierno uza y bisa cu el a scucha te hasta envolvi nan peticionnan. Sinembargo e mester ta un oportunidad real, pa influencia e decisionnan cu ta afecta henter economia.
