Pa fraccion di PPA, ta importante pa enfatisa cu Aruba ta den un momento economico peligroso. Prijs di petroleo mundial ta subi door di tension den Medio Oriente, costo di transporte ta aumenta (inclusivo e reportenan di flete cu ta subi total te 25%) y e analistanan internacional ta mustra un riesgo real di recesion mundial entre 30%–40%. Pa un isla cu depende mas cu 90% riba importacion, esaki no ta teoria, esaki ta realidad cu ya ta yega den cartera di pueblo. Pero segun parlamentario Eduard Pieters, loke ta mas preocupante no ta solamente e crisis global, sino e silencio hermetico di gobierno.
Pueblo di Aruba ta sinti e presion cada dia. Prijs ta subi sin control. Cuminda, transporte, construccion, tur cos ta birando mas caro. Pero te ainda, gobierno no a presenta un plan cla, ni un strategia concreto pa mitiga e impacto. Y esaki no ta aceptabel.
Un ehempel real: con sistema ta castiga pueblo
Parlamentario Eduard Pieters a comparti un ehempel simpel y pesonal, pero poderoso pa mustra con sistema actual ta funciona contra pueblo. Den area di construccion, un beton mat:
- Dos siman pasa: 35 florin
- E siman aki: 55 florin
Un aumento directo di 20 florin. Pero esaki no ta tur.
Door e sistema di BBO (belasting op bedrijfsomzetten), e prijs ta wordo multiplica den cada paso di cadena:
- Distribuidor ta paga BBO
- Negoshi final ta paga BBO
- Contratista ta incluye BBO den su prijs
Resultado? Un aumento inicial ta converti den un efecto acumulativo cu por yega 21% of mas riba e mesun producto. Y segun sector comercial, cu e situacion global, prijsnan por sigui subi. “Esaki ta un abuso cu nos sistema ta permiti,” Pieters a bisa. “Y gobierno no ta haci nada pa sauvisa e golpi.”
Gobierno ta beneficia, pueblo ta sufri
E realidad cu hopi hende no ta mira ta cu, mientras prijsnan ta subi, ingreso di gobierno ta subi tambe door e sistema di BBO. Esaki ta crea un situacion peligroso, unda pueblo ta paga mas, e negoshinan ta lucha, pero gobierno ta recauda mas fondo.
“Si bo no ta actua ora pueblo ta sufri, pero bo ta beneficia di e situacion, bo ta wordo considera nada otro como abusador” Pieters a enfatisa. Esaki ta un problema hopi serio.
Promesa politico traiciona
Durante campaña electoral, tanto AVP como MEP a propone claramente pa elimina BBO y introduci BTW (belasting toegevoegde waarde). Pero awe, despues di eleccion, e cambio no a sosode. Segun Pieters, esaki ta un caso claramente di: promesa haci, pero no cumpli.
“Si bo tabatin e balor y honestidad cu pueblo, despues di mas cu un aña den gobierno, bo lo a cuminsa cu e cambio fiscal aki,” el a bisa.
Solucion ta existi pero falta liderazgo
PPA ta propone un caminda husto y cla: Cuminsa transicion di BBO pa BTW (no ta acumulativo y ta mas husto). Termino corto: kita BBO riba flete y invoerrechten pa proteha y alivia consumidor. Esakinan no ta teoria of djis promesa, sino medidanan ehecutabel cu gobierno por implementa.
Pueblo no por warda mas
Segun Pieters Aruba ta enfrentando un tormenta economico perfecto: prijs global ta subi, transporte ta caro y riesgo di recesion ta real. Pero loke no por acepta ta un gobierno cu ta keda keto. Cada dia di silencio ta costa pueblo mas placa. Cada siman sin accion ta aumenta presion riba nos famianan. PPA ta manda un mensahe directo: No ban laga e crisis explota prome cu actua. No ban laga pueblo sufri pa falta di decision politico. Gobierno mester move awor, no mañan. Pasobra na final di cuenta, bo no ta midi un gobierno pa su palabra, pero pa con e proteha su pueblo, ora e pueblo mas tin mester.
