“Bon Pasco, Aruba. Den e temporada aki di reflexion y calidez, nos ta para un momento pa reconecta cu loke ta esencial: amor, humanidad y responsabilidad pa otro. Pasco ta invita nos pa baha speed, pa mira mas leu cu nos mes y pa recorda cu paz ta un balor cu mester practica, no solamente desea,” ta expresion di Eduard Pieters.
“Pasco ta mas cu un celebracion; e ta un yamada pa empatia y union. Den un aña cu a trece desafio, tension y incertidumbre, ta importante pa nos reconoce e fortalesa cu ta biba den nos comunidad. Nos ta wak e famianan cu no ta rindi, e muchanan cu ta sigui soña y e mayornan cu ta sigui guia nos muchanan cu sabiduria y amor. Esaki ta e Aruba cu mi ta kere den dje”.
Segun Eduard Pieters, Pasco ta recorda nos cu speransa no ta ingenuo; e ta un acto di curashi. Amor no ta debilidad; e ta liderazgo. Y paz no ta ausencia di conflicto; sino e boluntad pa trata otro cu respet, mas ainda ora opinion ta diferente. Como sociedad, nos por scoge pa construi brug, en bes di muraya, pa tende en bes di husga y pa sirbi en bes di domina.
“Mi sincero deseo pa tur Arubiano ta, pa e berdadero nificacion di Pasco yega den boso hogar cu paz, cu e renoba boso fe y speransa pa un mihor futuro y cu e fortalece nos compromiso cu otro. Laga nos sigui cu humildad, determinacion y amor pa nos isla. Bon Pasco y cu bendicion nunca falta den cada hogar na nos dushi isla Aruba”.
