Relaciona cu nombramento porfin di un minister plenipotenciario como tambe e reunion den Conseho di Minister di Reino di siman pasa, hopi argumento ta circula den comunidad tocante e posicion di Aruba relaciona cu e ley di HOFA. E argumentonan cu e gobierno aki ta bendiendo patrimonio cu ne ta: Aruba lo haya mas placa, cu interes di debe lo baha y cu supervision di Reino lo yuda fortalece disciplina financiero. Pero segun parlamentario Eduard Pieters di fraccion PPA, e discusion aki ta presenta di un forma simplifica y hasta engañoso. Pieters ta enfatisa cu Aruba tin alternativa serio pa fortalece control financiero, sin tin mester di entrega su autonomia constitucional bou di un ley di consenso di Reino.
Begrotingskamer: Un solucion local pa supervision financiero
Un di e argumento principal cu ta uza pa hustifica HOFA ta, cu Aruba mester supervision financiero externo. Pero PPA ta plantea un solucion cla: crea un Begrotingskamer den sistema constitucional di Aruba. Segun Pieters, esaki por wordo regla sea den:
- den un capitulo nobo di constitucion di Aruba;
- of como institucion bou di e.ñ capitulo di Raad van Advies van Aruba.
“Un Begrotingskamer por eherce control rigido riba presupuesto y disciplina fiscal, pero den marco di nos leynan local, manteniendo responsabilidad democratico den nos propio Parlamento. Durante un periodo transitorio, College financieel toezicht (CAFT) por continua haci su trabou actual di supervisa finansa, mientras Aruba gradualmente ta move na su propio mecanismo constitucional di control. Supervision ta necesario y Aruba por organisa esaki sin un Consensus Rijkswet,” Pieters a enfatisa.
Interes abou y “Mas Placa”
Pieters a expresa tambe cu otro argumento cu gobierno ta uza ta, cu HOFA lo trece reduccion di interes y acceso na mas financiamento y esaki no ta completamente corecto.
“E comunicado oficial di Conseho di Minister di Hulanda a indica cu reduccion di interes ta depende di cumplimento di e exigencianan, no simplemente door di firma HOFA. “Den otro palabra: interes lo baha si e paisnan cumpli cu disciplina fiscal y e normanan financiero.
Pues placa no ta bin automaticamente door di e ley”. Pieters a pone tambe un comparacion interesante, cu sigur nos mester para keto na dje. Corsou actualmente ta paga interes di aprox. 3.1%, mientras Aruba ta enfrenta interes mucho mas halto, esta 6.9% riba prestamo di e pandemia di Covid-19. Pa Pieters, esaki ta un punto cu mester negosha cu firmeza.
Les di 10-10-10: Supervision Permanente
“Experiencia di 10-10-10 reforma constitucional na Corsou y Sint Maarten mester sirbi como advertencia. Na 2010, e paisnan aki a drenta den un “slotverklaring” cu supervision di CAFT. E expectativa tabata cu supervision lo ta temporal. Pero despues di mas di 16 aña, supervision financiero ainda ta presente. Segun varios politico di e paisnan aki, sali for di e sistema di control ta extremamente dificil, pa no bisa imposibel,” Pieters a indica. Pero pa completa, e debenan a sigui subi; economia no semper a mehora; presupuesto no a logra surplus consistente.
“Pa PPA, esaki ta mustra claramente cu supervision externo no kiermen cu automaticamente ta soluciona problema economico y financiero”.
Status Aparte y responsabilidad di Parlamento
“Aruba su Status Aparte of Aruba 1986 tabata construi riba un principio fundamental: Parlamento di Aruba mester controla y supervisa gobierno. E instrumentonan como Raad van Advies ya ta forma parti di e sistema di control y supervision. PPA ta propone pa fortalece esaki cu un Begrotingskamer adicional”.
Segun Pieters, Aruba no tin motibo constitucional, huridico, financiero ni economico pa entrega mas control presupuestario na Den Haag. “Pa fraccion PPA, debate riba HOFA no ta simplemente tecnico. Ta un cuestion di principio: con Aruba kier maneha su finansa y su autonomia dentro di Reino Hulandes,” Pieters a sigui elabora.
Finalmente Pieters ta conclui cu Aruba tin capacidad pa demostra responsabilidad fiscal, mirando cu Aruba si a logra demostra surplus presupuestario, reduccion di debe publico y un economia cu despues di Pandemia a sigui crece. E mensahe di PPA ta cla: disciplina financiero mester bin di Aruba mes. Pasobra autonomia no ta solamente un derecho historico. Ta un responsabilidad politico cu mester wordo proteha cu determinacion.
