Fraccion di PPA a tuma nota den prensa cu finalmente Ministerio Publico lo bay trata e caso tragico di e hoben Ayden Lanooy. Como fraccion di PPA, nan ta hopi satisfecho cu porfin e famia di Ayden, pero tambe e famia di e polisnan involucra, por sinti cu tin un proceso di husticia na caminda. Awor ta yega e momento pa pueblo y pa ambos famia haya claridad, compronde kico a pasa y kico lo sosode tambe awor.
Husticia mester prevalece
Parlamentario di fraccion di PPA, Eduard Pieters, a expresa: “Nos como fraccion di PPA ta desea pa husticia prevalece. Esaki ta fundamental pa e famianan y pa confiansa den nos sistema. Nos lo sigui di hopi cerca kico lo ta e veredicto y con e proceso lo cana.”
Pieters a recorda cu den pasado, fraccion di PPA a entrega mocion y pregunta tocante uzo di bodycam y dashcam pa e polisnan. E dos aparatonan aki tin un meta cla: protega pueblo y polis, y duna transparencia y confiansa den un proceso hudicial. Na hopi pais bodycam y dashcam ta normal y investigacion a mustra cu nan por yuda hopi pa duna claridad y sera e casonan hopi mas liher.
Proyecto a inicia of no?
Na juli 2025, PPA a manda pregunta na Minister Dowers tocante e proyecto di bodycam. Awor a haya contesta, cu e proyecto piloto di bodycam, ainda no a ni sikiera inicia. Pieters:
“Awor cu nos ta den proceso di presupuesto, nos lo bolbe pidi claridad: kico a para cu e proyecto? El a inicia si of no? Kico a resulta di e prome paso? Pakico a limita na cierto distrito so? Cuanto fondo lo pone pa amplia e proyecto pa tur polis y den tur distrito?” Esaki ta preguntanan importante, paso sin un plan cla y sin ehecucion, pueblo y Polis no ta haya e proteccion y siguransa cu nan mester tin.
PPA lo sigui vigila
Eduard Pieters a enfatisa cu PPA ta hopi preocupa pa atraso den implementacion di bodycam y dashcam. “Minister mes a indica cu e proyecto lo inicia 1 di juli 2025. Awor nos kier wak accion concreto. Como parlamentario, mi ta dispone pa sigui pidi contesta cla y concreto y pa duna push pa cu esaki no keda riba papel y promesa den aire, sino p’e bira un realidad.”
Fraccion di PPA ta manda palabra di forsa na famia di e hoben Ayden Lanoy, como tambe na e polisnan y nan famia cu tabata involucra. “Casonan manera esaki ta lanta hopi dolor den nos comunidad, pero ta recorda nos, cu solamente cu transparencia, husticia y e medidanan preventivo nos por evita e tipo di tragedianan aki den futuro. Bodycam y dashcam ta un paso esencial, y PPA lo keda firme y vigila esaki pa pueblo,” Eduard Pieters a finalisa bisando.
