Den e rueda di prensa di diabierna 10 di april parlamentario Pieters a trece algun observacion hopi importante padilanti. E Rijkswet HOFA ta keda un topico di momento y e ta un situacion grave pa loke ta trata nos posicion di Aruba su Constitucion.
Sinembargo, segun Pieters, fraccion di PPA a haci varios intento pa discuti esaki na nivel local. Incluso a convoca reunion cu e gremionan, a yama reunion publico y a busca dialogo continuo cu gobierno riba e topico aki. Pero durante e reunion publico, a resulta ya gobierno unilateralmente a manda e ley di HOFA pa Rijksministerraad, sin ningun consenso di Parlamento. “Pues a bypass e proceso democratico completamente,” Pieters a declara.
Dialogo internacional como unico caminda
Mirando cu espacio local pa dialogo ta limita y a hiba varios encuentro cu diferente gremio, PPA a tuma decision pa hiba e combersacion na nivel internacional, na Den Haag. “Historicamente, cambio grandi semper a logra na mesa di dialogo,” Pieters a enfatisa. “Y si nos no por logra esaki na Aruba, nos lo busca e espacio afo.”
Democracia mester proteccion y no manipulacion
Pakico PPA ta haya cu e situacion actual ta lanta un pregunta fundamental? E pregunta ta: ta Parlamento ainda ta funciando como bos di pueblo of ta bira un instrumento di control politico? Pakico e preguntanan aki? Pasobra un retraso di 240 dia, manipulacion di agenda y bypass di proceso legal no ta cos chikito. Ta señal serio di un sistema cu ta desviando di su rol democratico. PPA ta manda un mensahe cla: Democracia y transparencia no ta opcion.
Respet pa reglamento no ta opcion. “Parlamento mester bolbe na su esencia: representa pueblo,” Pieters a conclui. “Paso sin esaki, nos no ta papia mas di democracia, pero di control.”
Aruba merece mihor.
