Si PPA ta bisa cu nos ta di acuerdo cu subi salario minimo di golpi por tin como efecto, aumento di e prijsnan y costo di bida, e siguiente pregunta logico ta: Anto kico PPA lo haci diferente?
Pa parlamentario Eduard Pieters, critica solamente no ta suficiente: “Nos ta critica fuerte, pero nos tin e solucionnan tambe.”
Durante e mesun conferencia di prensa, Pieters a pone dilanti dos propuesta cu PPA ya a presenta durante campaña 2024 den Plan Nos Aruba 2050: den 10 aña cera gradualmente e gap entre salario minimo y ‘bestaansminimum’ y introduci un ley di Beneficio Economico Laboral (BEL).
No cera e gap den dos luna
PPA ta di acuerdo cu salario minimo mester yega mas cerca di ‘bestaansminimum’, pero e forma con lo hacie, ta e diferencia. Pieters ta propone pa bin cu un trayecto di aproximadamente dies aña, basa riba investigacion, inflacion y dialogo cu gremio comercial y sindical.
Su argumento ta simpel: si bo aumenta costo salarial demasiado rapido, empresa lo calcula e gasto adicional den su prijs. Na final, e aumento cu e trahador haya, ta bay bek pa inflacion.
BEL: si compania gana, empleado tambe ta gana
Pero e propuesta cu Pieters ta pone central ta e ley di BEL. Segun su splicacion, un compania cu logra ganashi por comparti un parti di e ganashi cu su empleadonan bou di cierto acuerdo. A cambio, e compania por beneficia di un deduccion fiscal. E idea ta crea beneficio pa ambos partido.
Empleado haya ingreso adicional. Empresa haya incentivo fiscal. Dicho practica ta conoci na paisnan den Europa y te hasta tin informacion cu tin sindicatonan y empresa na Aruba cu ta haci uzo di e sistema aki caba.
Y, segun Pieters, e ingreso adicional no ta crea automaticamente e mesun cadena di aumento structural di salario (riba diferente nivel) y e primanan, cu un aumento general di salario minimo por provoca.
Mester corda cu tin tambe un efecto riba productividad.
“Ora empleado sinti cu e ta parti di progreso di compania, e ta produci mas. E sa cu si compania progresa, e tambe ta beneficia.” Pa Pieters, esey ta e diferencia fundamental: no obliga empresa solamente pa paga mas, pero crea un sistema caminda progreso di empresa ta comparti cu e hende, cu ta yuda crea e progreso pa ambos, tanto pa e empleado y empresa.
Pero costo di bida tin otro culpabel: BBO
Pieters no a keda solamente na salario. El a cuestiona con Gobierno por bisa cu kier combati costo di bida, mientras Aruba ta sigui cu un sistema di BBO cumulativo cu netamente ta contribui na e prijsnan halto.
El a enfatisa cu no ta di awor Minister Geoffrey Wever sa di e asunto aki, ya for di e gobierno anterior, unda el a sinta casi 4 aña y formando parti di e gobierno actual, cu tin como 2 aña, ta suma un total di 6 aña cu e minister no ta of kier atende e problema fiscal aki.
Pa Pieters, esaki ta e contradiccion: bo no por purba aumenta poder di compra, solamente via salario, mientras bo ta laga intacto e factornan cu ta pusha costo di bida ariba.
“Nos mester sinta den driver seat”
Ley di BEL ainda no ta un proposicion di ley presenta na Parlamento. Pieters a bisa cu PPA kier comberti e idea den realidad den un proximo gobernacion.
Segun Pieters, PPA a presenta mocion y amiendanan durante e ultimo añanan, pero cada biaha ta keda rechasa. P’esey e ta conclui cu pa implementa algun di e cambionan aki, partido mester haya responsabilidad di gobernacion. Finalmente e contraste politico cu Pieters ta pone enfasis ta simpel: “No ta solamente cuanto Gobierno por obliga un empresa pa paga. Ta con Gobierno por crea condicionnan, pa e empresa crece, e empleadonan beneficia y pa pueblo no perde e ganashi atrobe, door di e subimento di costo di bida”.
