Lider di fraccion di PPA, Eduard Pieters, a lanta preguntanan serio tocante e manera con gobierno ta distribui recurso publico den e lucha contra adiccion. Segun e parlamentario, Aruba ya tin varios organisacion y profesional, cu durante e añanan a dedica nan trabou na tratamento, orientacion y rehabilitacion di e personanan cu dependencia. Sinembargo, hopi di nan ta sigui opera cu recurso limita, mientras gobierno ta opta pa financia un fundación cu no ta posee profesionalnan den e ramo aki. “Nos no ta contra ningun iniciativa cu por yuda e personanan cu ta lucha cu adiccion. Tur esfuerzo serio merece reconocemento. Pero loke nos ta cuestiona ta e prioridad di gobierno.”
E profesionalnan cu ya ta den frontline ta pidi apoyo
Segun Pieters, e mesun organisacionnan cu diariamente ta den frontline di e lucha contra adiccion ta sigui expresa cu nan falta recurso, personal y capacidad pa atende e demanda creciente. “Nan ta pidi mas apoyo. Nan ta pidi mas capacidad. Nan ta pidi mas colaboracion. Sinembargo, gobierno ta dicidi pa pone recurso den un otro iniciativa.” Pa fraccion di PPA, esaki ta un pregunta legitimo cu mester haya un contesta cla y transparente.
Con a tuma e decision aki?
Pieters a haci e pregunta critico relaciona riba cua ta e criterionan cu gobierno a uza pa dicidi pa financia specificamente e organisacion aki.
- A base di cua estudio?
- A base di cua evaluacion?
- A consulta cu e profesionalnan cu ya ta traha den e veld di adicción, manera Stichting Hunto?
- Unda ta e plan nacional cu ta coordina tur e esfuerzonan?
“Pueblo tin derecho di sa con recurso publico ta distribui y pakico un iniciativa ta haya prioridad, mientras otro cu ya ta haci e trabou pa añanan largo ta sigui falta e apoyo necesario.”
No ta cuestion di ta contra un fundacion
Pieters a enfatisa cu PPA no ta contra e proyecto cu a haya financiamento. “Nos no ta cuestionando e bon intencion di e iniciativa. Nos ta cuestionando e decision politico tras di e asignacion di recurso.” Segun e lider di PPA, un gobierno responsabel mester fortalece e sistema cu ya ta existi, scucha e profesionalnan cu ta den e prome liña y sigura cu cada florin di placa publico ta inverti den un manera transparente, consistente y cu e mayor impacto pa comunidad.
“Gobernansa no ta solamente cuestion di gasta placa di pueblo pa hunga politica. Gobernansa ta cuestion di scoge e prioridadnan bon y husto. Y precisamente esey nos ta pidi gobierno pa duna claridad.”
