E tension den Parlamento di Aruba ta sigui aumenta. Parlamentario di fraccion di PPA, Eduard Pieters, a denuncia abiertamente e forma con e Presidente di Parlamento ta maneha e proceso di debate publico. Un maneho cu segun Eduard Pieters, ta sin respet, transparencia y esencia di nos democracia. Segun Pieters, loke a sosode awe mainta den Parlamento, no solamente ta un diferencia di opinion, sino un falta di respet sistematico na e 13 sindicatonan cu ta representa e forsa laboral di Aruba y un intento pa silencia e bosnan cu no ta cuadra cu e mayoria.
Falta di respet na e sindicatonan: invitacion estilo di ‘5 pa 12’
Pieters a indica cu awe mainta 8:30 e 13 sindicatonan mester a bin pa un reunion publico cu Parlamento, e invitacion di e Presidente a yega demasiado laat. “Ami mes a haya e invitacion ayera rond di 1’or di merdia, pa un reunion awe mainta 8:30am. Esaki ta un forma hopi no profesional y falta di respet pa trata cu bo sindicatonan,” el a bisa.
Segun Pieters, hopi di e representante sindical ta traha den sector publico y priva, unda nan mester pidi permiso y dispensacion pa sali di trabou. “Con bo por pensa cu nan lo por regla tur cos den menos di un dia? E Presidente sa bon bon cu esaki ta casi un mision imposibel,” el a señala. Pues ta duna espacio pa pensa, cu djis kier hunga un wega cu e sindicatonan, pa despues nan sali bisa, cu nan a invita nan, pero nan no a bin!
El a agrega cu e 13 sindicatonan a splica cla cu nan kier un dialogo real cu Parlamento, pero e manera cu e invitacion a wordo manda ta mustra un desorganisacion total, falta di consideracion y riba dje, falta di respet.
Silencio forsa den Parlamento: un actitud antidemocratico
Pieters a bay mas leu, denunciando cu e forma cu e Presidente di Parlamento ta maneha e sesionnan di reunion den Parlamento, a para bira un sistema di didactura y sensura. “Cada biaha cu mi kier papia, e ta sera e microfon. Esaki ta inaceptabel! Como miembro di Parlamento, mi tin e derecho di pidi un punto di ordo y como presidente, sr. Sneek tin e obligacion di duna mi palabra,” el a bisa indigna.
Eduard a mustra tambe cu e Presidente ta selecta entre e mes parlamentarionan ken lo papia y ken no, eliminando balans y respet cu un organo democratico mester tin.
“Esaki no ta solamente contra mi persona; ta contra e bos di pueblo cu mi ta representa,” Pieters a subraya. “E forma cu e Presidente ta actua ta un abuso di poder, un sistema pa sensura oposicion y destrui e confiansa di pueblo den Parlamento.”
Eduard Pieters a conclui cu palabra fuerte, pero cla y raspa: “Nos ta mira un Parlamento cu ta perdiendo su esencia, su respet y su independencia. Si un presidente por silencia e bos di pueblo, e ora democracia ta djis un decoracion.” Fraccion di PPA lo sigui para firme cu e 13 sindicatonan y cu tur Arubiano cu ta kere den transparencia, respet y participacion real.
“Nos no por sigui den un rumbo caminda microfon ta sera pa oposicion y porta ta sera pa e trahadornan di Aruba. E cas di pueblo mester keda habri, paso democracia sin bos ta simplemente un didactura cu un cara diferente.”
