Dos isla den e mesun Reino, ambos vulnerabel pa aumento internacional di prijs di petroleo. Pero segun parlamentario Eduard Pieters (PPA), e reaccion di Gobierno na Aruba y Corsou ta lanta un pregunta importante: “Pakico un isla por considera absorbe aumento di combustibel pa proteha su pueblo, mientras na Aruba consumidor ta enfrenta e posibilidad di paga mas?”
Durante conferencia di prensa, Pieters a compara e situacion economico di ambos isla y a cuestiona e espacio cu Gobierno di Aruba tin pa ofrece alivio.
“Corsou por. Pakico Aruba no?”
Pieters a señala cu, segun su evaluacion, Corsou ta enfrenta un posicion di debe publico mas pisa y no ta dispone di e mesun margen financiero cu Aruba.
Sinembargo, el a presenta Corsou como ehempel di un Gobierno, cu ta busca manera pa evita cu aumento internacional di combustibel ta pasa directamente pa consumidor.
“Si Corsou, cu su desafionan financiero, por considera e alivio aki, pakico Aruba no por haci e mesun?”el a señala.
E pregunta no ta solamente prijs di gasolin
Pa Pieters, aumento di combustibel tin consecuencia mas amplio cu e prijs cu automobilista ta paga na pomp di gasolin. Costo di transporte por afecta e gastonan di famia y empresa y eventualmente presiona prijs di producto y servicio.
P’esey, e ta considera importante pa Gobierno evalua, si tin posibilidad pa absorba parti di e aumento, ahusta e carganan aplicabel of presenta otro medida di alivio.
“Unda e prioridad di Gobierno ta?”
Pieters ta cuestiona si Gobierno ta dunando suficiente prioridad na reduccion di e presion economico riba ciudadano. Segun Pieters, e debate mester inclui no solamente e prijs internacional di petroleo, sino tambe e decisionnan cu Gobierno mes por tuma na nivel local.
E ta pidi claridad riba costo di un posibel intervencion, su duracion y e impacto riba finanza publico.
Alivio economico mester ta evalua seriamente
Pieters ta sostene cu Aruba mester examina e experiencia di Corsou y determina si un medida similar ta financieramente factibel. “Pueblo mester sa si Gobierno realmente no tin e posibilidad, of si simplemente no a scoge pa uza of sondia e posibilidad ey.”
Pa PPA, e pregunta politico central ta, si Gobierno ta dispuesto pa uza e margen cu e tin pa proteha poder di compra di ciudadano, sin pone stabilidad financiero di pais na riesgo.
“Si otro isla por busca un solucion pa su pueblo, Gobierno di Aruba mester por splica kico ta impidiendo nos di haci e mesun cos,” Eduard Pieters a enfatisa.
