Diabierna ultimo durante reunion publico Parlamentario Endy Croes y Fraccion di MEP a keda pone Geoffrey Wever bou presion cu algun pregunta cu Geoffrey na prome instante a nenga di contesta. Te na final den vraagpunten despues cu a puntra Geoffrey Wever desde diaranson riba e tema aki na varios ocasion el a bin admiti cu Gobierno a kibra regla di bon gobernacion.
Nombramento di director di Utilities, RDA, Serlimar y Comisarionan
Den programa di Futuro pagina 7 a stipula cu lo introduci e ley di Good Corporate Governance y tambe lo percura pa un proceso di solicitud pa cu nombramento di director y comisarionan di companianan estatal. Den acuerdo di Gobernacion 2025-2028 firma pa Futuro y AVP esakinan a wordo ripiti riba pagina 12 punto 3 “Vacaturanan publico y semi publico mester ta habri pa tur hende paden y pafo di sector publico. Punto 4 a papia di transparencia. Pagina 21 Maneho di Companianan Estatal, punto 3 “nombra director y comisario basa riba profesionalismo, educacion, experiencia y imparcialidad y den caso di nombramento di Director y Comisario, e nombramento ta tuma luga despues di consulta den conseho di minister”. Minister Geoffrey Wever a confirma den Parlamento cu solamente pa AAA y Postkantoor a cumpli cu e acuerdo di Gobernacion pa cu nombramento di director y comisario pero pa locual ta trata RDA, Serlimar y Utilities el a admiti cu Gobierno a peca door di NO cumpli cu nan propia acuerdo. Ningun di e ultimo nan aki tabata tin un open sollicitatie, ningun a cana un proceso transparente, ningun a tuma un desicion despues di consulta cu conseho di minister es decir cu varios minister no ta ni na altura. A just parachuteer amigonan di AVP den e funcion haltonan aki. Aki nos kier para keto y puntra lider di partido Futuro Gerlien Croes si e ta na altura como cu Gerlien Croes a declara públicamente, cu hasta pa su Bureau tin open sollicitatie. Gerlien Croes ta grita tur dia y /of papia di bon gobernacion y Good Corporate Governance. Unda Gerlien Croes ta awor? Den prome 100 dia AVP y Geoffrey a pas’e un cantidad di fastball.
Gerlien Croes ta “buitenspel” y Futuro ta manera side liners
Nos por corda e cantica popular durante carnaval ‘Side Liners’. Esnan cu no por paga pa bay den grupo ta compaña e e banda musical patras di baricada henter e parada. Tabata un fenomeno cu a crea hasta mas ambiente. Wel awor cu Geoffrey Wever a admiti den Parlamento e eror cometi y e kiebro di nan propio acuerdo ta splica nos cu Futuro y Gerlien Croes ta mescos “side liners” y AVP cu consciencia di Geoffrey Wever ta manda Gerlien Croes snoepreisje Hulanda pa despues sigui goberna tuma decisionnan contra nan propio acuerdo di gobernacion. Muy probablemente Lendersnan lo fluit gobierno terug cu nombracion di Franklin Hoevertsz y Frederick Nuboer. Time will tell. Un gobernacion cu NO ta transparente y ta bulldoze nan propio acuerdo. Aruba merece miho!
