Parlamentario Endy Croes a sali diamars ultimo pa Hulanda. Debi na compromisonan na Aruba no por a biaha diadomingo sinenvargo lo ‘join’ e delegacion na tempo pa asina por reuni tanto den Tripartiet y IPKO.
Endy Croes na aeropuerto na salida a splica cu tin un agenda basta pisa pero meta sigur lo ta pa atende tambe e tema di Rijkswet.
Parlamentarionan di AVP y Futuro lamentablemente no tin experencia:
Den cuadro di IPKO ‘Interparlementair Koninkrijkoverleg’nos tin un delegacion cu representantenan di AVP y Futuro encabesa pa AVP kendenan lamentablemente no tin e experencia necesario y tampoco e amor patria. Nos lo percura pa duna nos sosten y conseho na unda esaki ta rekeri y riba puntonan cu nos ta di acuerdo como cu ta pais ta Aruba nos ta representando. Tin un punto cu MEP no ta di acuerdo cu AVP y Futuro esta e Rijkswet. E gobierno Eman Croes Wever na manera di ladronnan di anochi a entrega nos autonomia financiero na Hulanda sin nunca a consulta cu Pueblo tampoco Parlamento. Cu e actitud aki gobierno a viola un acuerdo di September 2022 di IPKO firma pa Parlamentonan di tur 4 pais den Reino. Sigur riba e punto aki MEP lo elabora tanto den IPKO pero tambe den varios reunion separa cu MEP a logra haya cu topnan na Hulanda. MEP no por ta di acuerdo cu e hobennan di AVP y Futuro kendenan no conoce e lucha di nos grandinan y awor ta traciona e lucha di Betico. Ta traciona e lucha di nos grandinan kendenan a sostene Betico Croes incondicionalmente den transcurso di mas di 15 aña pa logra nos Status Aparte. Danki na nos Status Aparte Aruba tin su Banco Central, su propio Parlamento, su propio gobierno, su propio moneda y nos simbolonan di libertad manera nos Himno y nos Bandera. Tur esaki a percura pa e desaroyo socio economico di nos isla y nos turismo ta awe unda cu e ta danki na nos autonomia pa tuma nos propio desicionnan. Algemene Rekenkamer di Hulanda a hasi un investigacion riba meta y funcion di e Rijkswet di St Maarten y Corsou desde 10 di october 2010 (10-10-10) y resultado tabata devastador. Rijkswet a stroba Corsou entre otro den su desaroyo socio economico y no a funciona manera Hulanda a pensa. Pues a stroba Corsou y St Maarten di crece y desaroya y tampoco a logra e obhetivo pa frena e crecemento di nan debe nacional. Pakico pusha Aruba awor cu algo cu no a funciona? Sigur nos voz lo resona pa para pa nos derecho. Locual ta otro puntonan di agenda manera ‘Geopolitieke ontwikkeling, Beroepsonderwijs in het Koninkrijk, spontaan advies’ di Raad van State riba 70 aña di Statuut, ‘vergrijzing’ pa nombra algun nos lo percura pa trata esaki nan semper cu respet pa otro y cu tur seriedad.
