Parlamentario Endy Croes a keda asombra siman pasa den e ultimo Reunion Publico. Durante dicho reunion Parlamentario Croes den nomber di Fraccion di MEP a entrega un mocion pa gobierno nombra Desiree Croes pa ocupa e posicion di ‘Gevolgmachtig Minister’ na Den Haag Hulanda y lo splica esaki.
Diabierna 29 Augustus AVP y Futuro a entrega nos Libertad na Hulanda
Diabierna 29 di Augustus e traidornan di Patria, Mike , Gerlien y Geoffrey a bay Parlamento pa un reunion publico pa brinda informacion riba negocacionnan cu Hulanda riba un posibel Rijkswet financiero. Manera entreguista y traidornan di marca mayor Mike Eman, Gerlien Croes y Geoffrey Wever a informa Parlamento cu nan ya caba a bay di acuerdo cu Rijkswet y cu esaki mesun dia a wordo trata caba den Rijksministerraad na Hulanda. Tur esaki sin a consulta cu Parlamento. Es mas, Aruba no tin un Gevolgmachtig Minister na Hulanda y nos a compronde cu ta Gevolgmachtig Minister di Corsou a representa y papia pa Aruba den e proceso durante Rijksministerraad. Esaki a lanta e precupacion mas aun den MEP cu Aruba “mester” tin su Gevolgmachtig Minister primordialmente pa atende un tema asina gevoelig manera Rijkswet.
Parlamentario Endy Croes a entrega un mocion pa Desiree Croes bira minister
Durante Reunion Publico siman pasa den nomber di Fraccion di MEP Parlamentario Croes a presenta un mocion pa Gabinete AVP-Futuro nombra Desiree Croes como Gevolgmachtig Minister pa representa Aruba na Den Haag Hulanda. Primordialmente kier a pone dos nomber den e mocion, Juan Ady Thijsen y Desiree Croes. Como cu nos sa cu Coalicion tin mayoria y nos tin e urgencia pa Aruba tin un Gevolgmachtig Minister na Hulanda nos a opta pa bay por lo sigur pa pone solamente nomber cual ta Desiree Croes y a kere cu AVP sigur lo bay sostene esaki. Desiree Croes banda di ta un docente di school e ta un Abogado, a sirbi Aruba como Parlamentario y tabata Director na Arubahuis y ta un bon candidato cu hopi conocemento pa e puesto aki.
MEP a keda den ‘Shock’:
Stephany Sevinger di AVP a lanta para den sala como unico Parlamentario di AVP cu a hiba un ‘stem motivering’ pidiendo AVP pa vota CONTRA e mocion pa Gabinete AVP-Futuro nombra Desiree Croes como Gevolgmachtig Minister. MEP a sostene e mocion aki y ta lamenta masha hopi cu AVP a vota CONTRA Desiree Croes. Mike de Meza ta e unico Parlamentario di AVP cu a sostene e mocion y a sostene desiree Croes. Mi amigo Ady Thijsen tin un dicho popular “Politica ta cruel”!
