Endy a prueba cu a laga 17 miyon cash den caha di Lotto na 2009
Parlamentario Endy Croes durante tratamento di e Ley di Gaming Board diabierna ultimo a desenmascara Mike de Meza y AVP den totalidad cu prueba den man. Como cu e ley di Gaming Board a toka no solamente Casino pero tambe Lotto pa Deporte y otro weganan di plaka a dicidi cu ta e momento oportuno pa hasi tal den di segunda tanda.
Pa hopi aña Mike de Meza y AVP a crea un impresion robez:
Parlamentario Croes a splika den sala di Parlamento cu desde 2010 AVP y Mike de Meza a crea un impresion eroneo riba maneho di MEP alrespecto Lotto pa Deporte. E sed pa vegansa tabata asina grandi den AVP cu nan a gasta 5 MIYON florin total di Deporte pa investiga esnan saliente di MEP. Mientras atletanan ta den solo ta bende rifa e Bestuur di AVP a malgasta y desgracia nan plaka. Amigonan abogado di AVP a strica masha hopi plaka. Parlamentario Croes a sigui splica cu e rapportnan di Accountant di Lotto a keda scondi pa casi 10 aña pero porfin nan a cay den nos bus. Cu documento y rapportnan di propio Lotto pa Deporte den man Croes por a demostra cuanto plaka a keda den Banco y con hopi plaka di Deporte a wordo malgasta pa propio hendenan di Mike de Meza cu a wordo pone den bestuur.
Cu prueba den man a ilustra “Cash on the Bank na 2009”:
Parlamentario Endy Croes a tabata tin den sala di Parlamento den su poder un rapport di accountant kantoor di Lotto pa Deporte di anja 2010, (di amigonan di AVP) cual porfin a bini na luz di dia. E propio rapport aki a ilustra cu “CASH on the BANK” na final di anja 2009 esta per 31 di December 2009 Lotto pa Deporte tabata tin 5.75 MIYON florin.( bijlage adhunto). Alavez Lotto pa Deporte tabata tin na su disposicion 11.5 MIYON florin cash di e lening di plaka di Plant NV cu a wordo presta di gobierno pa e 3 proyectonan den pleno ehecusion e tempo aya esta Baseball veld Crismo Angela /Nadi Croes, Baseball veld na Pos Chiquito y futbol veld na Yara. Pues Parlamentario Croes a bisa a dura 10 aña pa nos por a pone man riba documentonan y kibra e storia mentiroso di Mike Eman, Mike De Meza y Donkey Tromp entre esnan cu tabata grita cu Lotto a keda bancarota na 2009. E pruebanan aki ta kibra e storia di manipulacion di Mike Eman y AVP awor pa semper.
Endy a reta Mike de Meza pa pidi Persoonlijk feit:
Durante betoog di Parlamentario Endy Croes e lider fragil di AVP esta Mike Eman manera custumber a core bandona sala. Den mesun rosea Parlamentario Croes a menciona Mike de Meza su nomber na varios ocasion y a reta Mike de Meza pa pidi un persoonlijk feit y pa desmenti e informacion cu Croes tabata tresiendo dilanti cu rapport y documento den man. Pa straña cu esaki ta zona Mike de Meza a prefera di keda keto y no a reaciona. Asina por a prueba atravez di nan propio rapportnan cu a keda 17 miyon cash den caha di Lotto pa Deporte na final di 2009.
Bestuur di AVP a aumenta gasto general cu 2 miyon den un aña:
E rapport di accountant kantoor di Lotto pa Deporte cual a keda scondi pa 10 aña a ilustra parti di e maneho desastrozo. Por a detecta con a aumenta e “General Expenses” di Lotto pa Deporte cu 2 MIYON den un solo aña comparando 2009 (MEP) y 2010 (AVP). Pues tempo di maneho di Ramon Lee gastonan general tabata alkansa 800 mil pa aña ( 2009) y manera Mike de Meza su gang a tuma over e promer aña siguiente esaki a alkansa 2.8 miyon pues un aumento di 2 MIYON di plaka di Deporte cu a wordo malgasta. Dieptriest. Adhunto ta pone parti nan di rapport di propio Lotto pa Deporte. Pronto e BESTUUR di Lotto cu Mike de Meza a instala 12 aña pasa lo wordo manda cas. Legalmente nan termino ta caba dentro di algun siman nos dilanti. No tin caminda pa bay Hues mas. Parlamentario Croes a manda mensahe pa dicho bestuur cuminsa paketa boso boeltjie y alaves ta manda mensahe pa e Directeur percura y garantisa pa tur documento ta den Lotto. E gobierno nobo no lo acepta storia cu tin documentonan perdi. Pues cada ken carga nan responsabilidad. Asina aki ta trese claridad na un mentira orchestra pa 10 aña largo door di politiconan maligno di AVP. Biento nobo lo bay supla!
